રોડ પર ચાલી રહેલ વૃધ્ધાના ગળામાંથી ચેઈન આંચકી મોટરસાયકલ સવાર ફરાર: પારડી પોલીસે વિવિધશંકાસ્પદો તથા સીસીટીવીના આધારે તપાસ હાથ ધરી
(વર્તમાન પ્રવાહ ન્યુઝ નેટવર્ક)
પારડી, તા.27: પારડી તાલુકાના બરઈ માહ્યાવંશી ફળિયાના રહેવાસી અને હાલમાં ઓરવાડ ભગીની સમાજની સામે શ્રીજી કોમ્પલેક્ષમાં રહેતા વેણીબેન પ્રેમાભાઈ માહ્યાવંશી આજરોજ આશરે 11 વાગ્યે ઘરેથી રેંટલાવ ખાતે આવેલ રોયલ મેડિકલ સ્ટોરમાં દવા લેવા માટે નીકળ્યા હતા. દવા લીધા બાદ તેઓ રસ્તા પર ઊભી રહેતી શાકભાજીની લારી ઉપરથી શાકભાજી લઈ પરત પોતાના ઘરે રોડ પરથી ચાલતા ચાલતા આવી રહ્યા હતા તે દરમિયાન આશરે 30 વર્ષના કાળુ પેન્ટ અને કાળુ શર્ટ પહરેલ યુવાન કાળા કલરની મોટરસાયકલ લઈ પાછળથી આવી વેણીબેનના ગળામાં પહેરેલ એક તોલાની સોનાની ચેન કિંમત રૂપિયા 40,000 આંચકી લઈ ઉદવાડા ગામ તરફ ભાગી છૂટયો હતો.
બનાવની જાણ થતા આજુબાજુના દુકાનદારો તથા રેંટલાવ ગામના ઉપ સરપંચ અહમદભાઈ વિગેરેઓ દોડી આવી આસપાસ તપાસ દરમિયાન આરોપી મળી ન આવતા લોકોએ વેણીબેનના વહુ રક્ષાબેન મનોજભાઈ માહ્યાવંશીને બનાવની જાણ કરી ઘરેથી બોલાવી લીધા હતા.
વેણીબેને પારડી પોલીસ સ્ટેશનમાં બનાવ અંગેની ફરિયાદ નોંધાવતા પારડી પોલીસે શંકાસ્પદો તથા સી.સી.ટી.વી. ફૂટેજને આધારે વધુ તપાસ હાથ ધરી આરોપી સુધી પહોંચવાનાચક્રો ગતિમાન કર્યા છે.