સેવા મિત્ર મંડળના સભ્યો વર્ષભર ચકલીઘર અને પાણી બાઉલ બનાવાની કામગીરી ચાલુ રાખે છે
(વર્તમાન પ્રવાહ વાપી બ્યુરો)
વાપી, તા.18: વલસાડ સેવા મિત્ર મંડળ દ્વારા છેલ્લા 10 વર્ષથી સેવ ધ સ્પેરો અભિયાન ચલાવી માનવતાની મહેક પ્રસરાવી રહ્યા છે. ગરમીનો પ્રારંભ થતા સેવ ચકલી અભિયાન પ્રત્યેક વર્ષે કરવામાં આવે છે. વલસાડ તિથલ રોડ ઉપર વલસાડ સેવા મંડળ દ્વારા 4500 ચકલી ઘર અને 2500 ઉપરાંત પાણીના બાઉલ નિઃશુલ્ક વિતરણ કરવામાં આવ્યા હતા.
તા.20 માર્ચ એટલે વર્લ્ડ સ્પેરો દિવસ. આદિવસની ઉજવણી વલસાડ સેવા મિત્ર મંડળ વાસ્તવિક રીતે સાર્થક કરે છે. ઉનાળાની ગરમી શરૂ થતા જ આ મિત્ર મંડળ ચકલીઓ સાર-સંભાળની માનવતા ભરી કામગીરી શરૂ કરે છે. વર્ષભર સેવા મંડળના સભ્યો ચકલી ઘરો અને પાણીના બાઉલ બનાવાની કામગીરી સતત ચાલુ રાખે છે. જેવી ગરમી શરૂ થાય કે તુરત જ ચકલીઓની સાર-સંભાળ માટે કમર કસી લે છે. વર્ષભર બનાવેલા ચકલી ઘર અને પાણી બાઉલનું જાહેરમાં નિઃશુલ્ક વિતરણ શરૂ કરી દે છે તે અનુસાર તિથલ રોડ ઉપર ચકલી ઘર અને પાણી બાઉલનું વિતરણ શરૂ કરી દીધું છે. એટલું જ નહીં શહેરના મોટા મોટા વૃક્ષો ઉપર ચકલીઓ ખાસ વસવાટ કરતી હોય છે તેવા વૃક્ષોને શોધી શોધી વૃક્ષો ઉપર ચકલી ઘરો લગાવતા રહે છે.
