(વર્તમાન પ્રવાહ ન્યુઝ નેટવર્ક)
સેલવાસ,તા.19: સેલવાસના બાવીસા ફળીયા રોડ પરથી પસાર થઈ રહેલ રાહદારીને ઓટો રીક્ષાને ઓવરટેક કરવાની લ્હાયમાં બાઈકચાલકે હેન્ડલ અડાડી દેતાં અકસ્માત સર્જાયો હતો. આ અકસ્માતમાં રાહદારીને ગંભીર ઈજા પહોંચી હતી. જેમને સારવાર અર્થે સિવિલ હોસ્પિટલમાં લઈ જવામા આવ્યા હતા, જ્યાં રાહદારીનું સારવાર દરમ્યાન મોત થયું છે.
પ્રાપ્ત વિગત પ્રમાણે આશિક સેન (ઉ.વ.28) રહેવાસી સેલવાસ. જેઓસાયલીથી કંપનીમાં નાઈટ ડ્યુટી કરી પરત પગપાળા એમના રૂમ તરફ જઈ રહ્યા હતા. તે સમયે બાવીસા ફળિયા રોડ પર અજાણ્યા બાઈક સવારે ઓટો રિક્ષાને ઓવરટેક કરવાની લ્હાયમાં સ્પીડમાં પસાર થઈ રહ્યો હતો, તેની બાઈકનું હેન્ડલ આશિક સેનના પેટના ભાગે લાગતા તેઓ નીચે પટકાયા હતા. જેના કારણે એમને ગંભીર ઈજા પહોંચી હતી. આ ઘટના જોતાં આજુબાજુના લોકો દોડી આવ્યા હતા અને 108 એમ્બ્યુલન્સ બોલાવી ઈજાગ્રસ્ત યુવકને સારવાર અર્થે સેલવાસ શ્રી વિનોબા ભાવે સિવિલ હોસ્પિટલમાં લઈ જવામાં આવ્યા હતા. બાઈક સવાર પણ હોસ્પિટલ પર આવ્યો હતો, પરંતુ બાઈક સવાર ઈજાગ્રસ્ત આશિકને દાખલ કર્યા બાદ પોતાનો મોબાઈલ સ્વીચ ઓફ કરી ફરાર થઈ ગયો હતો. સારવાર દરમ્યાન આશિક સેનનું મોત થયું હતું. આ ઘટના અંગેની ફરિયાદ નોંધી ફરાર બાઈક સવારનો બાઈક નંબરના આધારે સેલવાસ પોલીસ તપાસ કરી રહી છે.
