ઝંડાચોક વિસ્તાર સહિત દિપડો અવાર નવાર નજરાય છે :
ફોરેસ્ટનું પાંજરુ પણ કારગત નહી
(વર્તમાન પ્રવાહ વાપી બ્યુરો)
વાપી, તા.22: વલસાડ જિલ્લામાં અનેક ગામોમાં જંગલી રાની પશુઓની અવર જવર સમયાંતરે જોવા મળી રહી છે. વલસાડ નજીક આવેલ પ્રસિધ્ધ યાત્રાધામ પારનેરા ગામે પણ છેલ્લા બે મહિનાથી દિપડાની હાજરી વારંવાર જોવા મળી રહી છે. તેથી ગામમાં ભયનો માહોલ આચ્છાદિત થયેલો જોવા મળે છે. ગતરોજ રાતે દિપડાની એન્ટ્રી ગામમાં થઈ હોવાનું પ્રતિત થયું છે. દિપડો એક ગાયનું મારણ કરી ભાગી ગયો હતો.
વલસાડના પારનેરા ગામે છેલ્લા બે મહિનાથી દિપડો આવતો જતો રહે છે. થોડા સમય પહેલાં ઝંડાચોકમાં જાહેર રોડ ઉપર દિપડો રાતે લોકોએ જોયો હતો તેથી દિપડાને કબજે કરવા માટે ગ્રામજનોની રજૂઆત ગામમાં પાંજરૂ પણ વનવિભાગે ગોઠવ્યું છે. પણ ચાલક દિપડો બે મહિનાથી પાંજરે પુરાતો ન હોવાથી ગ્રામજનો ભયના ઓથાર વચ્ચેજીવી રહ્યા છે. રોજ જીવ પડીકે બંધાઈ રહે છે. પંચાયતે પારનેરા ડુંગર સહિત દિપડા અંગેની ચેતવણીના જાહેર બોર્ડ પણ સલામતિ અને ચેતવણી માટે લગાવ્યા છે. પણ દિપડો હજુ પકડાતો નથી. માનવી પર્યાવરણ અને જંગલોનો વિનાશ વિકાસના નામે કરી રહ્યો છે તેથી જંગલી પ્રાણીઓ રહેણાંક વિસ્તારમાં ખોરાકની શોધમાં અવાર નવાર આવવાનો સિલસિલો વલસાડ જિલ્લામાં યથાવત રહ્યો છે.