(વર્તમાન પ્રવાહ ન્યુઝ નેટવર્ક)
દમણ, તા.27 : સંઘપ્રદેશ દાદરા નગર હવેલી અને દમણ-દીવમાં મુક્ત, ન્યાયી, પારદર્શક અને નિષ્પક્ષ ચૂંટણી યોજવા માટે પ્રદેશના ચૂંટણી વિભાગ દ્વારા અગમચેતીના અનેક પગલાંઓ ભરવામાં આવી રહ્યા છે. આજે મુખ્ય ચૂંટણીઅધિકારી શ્રી ટી. અરૂણના નેતૃત્વમાં પ્રદેશના 8 ડિસ્ટિલરી પ્રબંધકો સાથે પણ આ મુદ્દે ગહન ચર્ચા-વિચારણાં કરવામાં આવી હતી.
સંઘપ્રદેશ દાદરા નગર હવેલી અને દમણ-દીવમાં ચૂંટણી દરમિયાન ખુબ જ મોટાપાયે દારૂ-બિયરની ખુલ્લેઆમ લ્હાણી કરી મતદારોને પ્રભાવિત કરવાના પ્રયાસો લગભગ તમામ પક્ષ અને ઉમેદવારો દ્વારા કરવામાં આવતા હોય છે. સંઘપ્રદેશના ચૂંટણી તંત્રએ આ વખતે દારૂ-બિયરનો પ્રભાવ ચૂંટણી પ્રક્રિયામાં નહીં પડે તે માટે દારૂ-બિયરનું ઉત્પાદન કરતી ડિસ્ટિલરીઓ માટે માપદંડ જાહેર કરાયા છે.
દરમિયાન જિલ્લા સ્તરીય નોડલ અધિકારી આઈએમએફએલ, બિયર અને દેશી દારૂના જુદા જુદા પ્રપત્રોમાં પ્રોફોર્મા અનુસાર દૈનિક રિપોર્ટ રાજ્ય સ્તરીય નોડલ અધિકારીને રજૂ કરશે. જેના કારણે દારૂ-બિયરના જથ્થાની આવક અને જાવકનો હિસાબ દૈનિક સ્તરે ચૂંટણી તંત્રને મળતો રહેશે.
