સ્ટેયરીંગ ઉપરથી કાબુ ગુમાવતા સર્જાયેલો અકસ્માત : ઘાયલોને સારવાર માટે ખસેડાયા
(વર્તમાન પ્રવાહ વાપી બ્યુરો)
વાપી, તા.31: વલસાડ જિલ્લાના કપરાડાના પર્વતીય ઢોળાવવાળા રસ્તા ઉપર સુથારપાડા નજીક મુસાફરો ભરેલી જીપના ચાલકે સ્ટેયરીંગ ઉપરથી કાબુ ગુમાવતા જીપ ખાઈમાં ખાબકી જતા ગંભીર અકસ્માત સર્જાયો હતો. અકસ્માતમાં છ જેટલા મુસાફરો ઘાયલ થયા હતા.
કપરાડા વિસ્તારમાં સુથારપાડા સહિતના રોડ ઢોળાવવાળા અને જોખમી છે તેથી આ વિસ્તારમાં ટ્રક કે અન્ય વાહનો પલટી મારી જવાના અકસ્માતો લગાતાર સર્જાતા રહે છે તેવો વધુ એક અકસ્માત આજે કપરાડાના સુથારપાડા નજીક સર્જાયો હતો. નિયમિત રોજી રોટી કમાવવા મજુરી કામે નિકળતા લોકોની ભરેલી જીપ કપરાડા તરફ આવીરહી હતી ત્યારે ચાલકે સુથારપાડા નજીક વળાંકમાં કાબુ ગુમાવતા જીપ પલટી મારી ગઈ હતી. અકસ્માતમાં છ જેટલા મુસાફરો ઘવાયા હતા. જે પૈકી બેની હાલત વધુ ગંભીર હતી. તમામને 108 દ્વારા કપરાડા સરકારી હોસ્પિટલમાં સારવાર માટે ખસેડાયા હતા. વધુ આગળની તપાસ કપરાડા પોલીસે હાથ ધરી હતી.
