પોલીસે રોકડા રૂપિયા-મોબાઈલ મળી 80 હજારનો મુદ્દામાલ જપ્ત કર્યો: પાર્સલ ડબ્બામાં ચાલુ ટ્રેનમાં જુગાર રમાતો હતો
(વર્તમાન પ્રવાહ વાપી બ્યુરો)
વાપી, તા.09: રેલવેમાં દારૂ હેરાફેરીના કિસ્સા અવાર નવાર બહાર આવે છે પરંતુ ચાલુ ટ્રેનમાં જુગારધામ ઝડપાયાનો બનાવ પ્રકાશમાં આવ્યો છે. પોરબંદર-બાન્દ્રા ટ્રેનમાં ચાલુ ટ્રેનમાં જુગાર રમતા 9 પુરુષ અને 7 મહિલાઓને રેલવે પોલીસે ધરપકડ કરી જેલભેગા કર્યા હતા.
સુરતથી વિકલાંગ ડબ્બામાં પોરબંદર-બાન્દ્રા ટ્રેનમાં કેટલીક મહિલા અને પુરુષો બેસી ગયેલા બાદમાં એ તમામ પાર્સલ ડબ્બામાં ગોઠવાઈ જઈને ચાલુ ટ્રેનમાં હાર-જીતનો જુગાર શરૂ કરેલો. પોલીસને બાતમી મળી ગઈ હતી. તેથી બીલીમોરા અને અમલસાડ સ્ટેશનથી પોલીસે ચેકીંગ કામગીરી હાથ ધરી હતી. અંતે પાર્સલ ડબ્બામાં ચાલુ ટ્રેનમાં 9 પુરુષો અને 7 મહિલા મળી કુલ 16 જણા બિંદાસ જુગાર રમી રહેલા ઝડપી પાડયા હતા. પોલીસે વલસાડ સ્ટેશને તમામને નીચે ઉતારી રેલવે પોલીસમાં કાયદેસરની 17 જુગારીયા વિરૂધ્ધ ફરિયાદ નોંધી તમામની ધરપકડ કરી હતી. કાર્યવાહીમાં પોલીસે 40 હજાર રોકડા અને મોબાઈલ મળી 80 હજારનો મુદ્દામાલ જપ્ત કર્યો હતો.
