પાલિકાની પ્રિમોન્સુન કામગીરીની પહેલી વરસાદે જ પોલ ખોલી દીધી
(વર્તમાન પ્રવાહ વાપી બ્યુરો)
વાપી, તા.05: છેલ્લા દોઢ બે મહિનાથી વલસાડ જિલ્લામાં કાળઝાળ ગરમી વરસી રહી છે ત્યારે આજે બુધવારે ચોમાસાના પ્રથમ વરસાદે વલસાડ શહેરમાં દસ્તક દીધા હતા. સારો એવો ધોધમાર વરસાદ વહેલી સવારથી વરસતા લોકોએ ગરમીના વાતાવરણ વચ્ચે વરસાદને લઈ ટાઢકનો અનુભવ થયો હતો.
વલસાડમાં આજે બુધવારે સવારે અચાનક વાતાવરણમાં પલટો આવ્યો હતો અને જોતજોતામાં ધોધમાર વરસાદ વરસી પડયો હતો. વરસાદનું આગમન મનભાવન અને આલ્હાદક લોકોને લાગ્યું હતું. કારણ કે છેલ્લા દોઢ-બે મહિનાથી કાળઝાળ ગરમી અને હીટવેવનો લોકો સામનો કરી રહ્યા હતા તે મધ્યે વરસેલા વરસાદે ગરમીમાં ઘણી રાહત આપી હતી. હજુ તો સિઝનનો પહેલો વરસાદ શહેરમાં પડયો છે ત્યાં મોગરાવાડી રેલવે નાળુ પાણીથી ભરાઈ ગયું હતું તો બીજા નિચાણવાળા ભાગોમાં વરસાદી પાણીનો ત્વરીતે નિકાલની ક્ષતિઓ ઉઘાડી પડી હતી. ખાબોચીયા અને પાણીનો ભરાવો જોવા મળતો હતો તેથી એવું ચોક્કસ લાગી રહ્યું હતું કે, પાલિકા દ્વારા મોટા ઉપાડે કરાયેલી કહેવાતી પ્રિમોન્સુન કામગીરી માત્ર કાગળ ઉપર જોવા મળી છે. હજુ તો ચોમાસુ આવ્યું નથી પણપાલિકાની પોલ પ્રથમ વરસાદે જ ખોલી નાખી છે.
