(વર્તમાન પ્રવાહ ન્યુઝ નેટવર્ક)
સેલવાસ, તા.06: ગુજરાતના વલસાડ જિલ્લાને તેમજ મહારાષ્ટ્રના પાલઘર જિલ્લાને અડીને આવેલા કેન્દ્ર શાસિત પ્રદેશ દાદરા નગર હવેલીમાં આજે સવારથી જ ભારે ગરમીના કારણે ઉકળાટભર્યા વાતાવરણનો માહોલ હતો. બપોરે જબરદસ્ત ગરમી બાદ મોડી સાંજે વાદળો ઘેરાતા ધીમી ધારે વરસાદ વરસી પડયો હતો.
પ્રાપ્ત માહિતી પ્રમાણે દાદરા નગરહવેલીના કેટલાક ગામડાંઓ સહિત સેલવાસ શહેર વિસ્તારમાં મોડી સાંજે પવનના સૂસવાટા સાથે વરસાદ શરૂ થયો હતો. પવન સાથે વરસેલા વરસાદના કારણે લોકોએ ગરમીથી થોડી રાહતની લાગણી અનુભવી હતી. પરંતુ એકબાજુ વરસાદના કારણે કેરીના પાકને પણ નુકસાન થવાની સંભાવના જોવાઈ હતી. દાનહમાં પુરા દિવસ દરમ્યાન બફારાના ઉકળાટભર્યા વાતાવરણ બાદ વરસેલા વરસાદથી લોકોએ ઠંડકનો અહેસાસ કર્યો હતો. હવે ચોમાસાની શરૂઆત માટે માત્ર ગણતરીના દિવસો બાકી રહ્યા છે ત્યારે ગમે ત્યારે વરસાદી સિઝનનો પ્રારંભ થશે.
