ગ્રામ પંચાયત દ્વારા જાહેરમાં કચરો ઠાલવનારા સામે લાલ-આંખ
કરવામાં આવે તે જરૂરી
(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.24: ચીખલીના થાલામાં કોલેજ સર્કલથી વસુધારા ડેરી રોડ પરથી પસારથતી નહેરની પાળ ઉપર છેલ્લાં ઘણા સમયથી મોટા પ્રમાણમાં પ્લાસ્ટીકનો કચરો ઠાલવવામાં આવી રહ્યો છે. આમ તો થાલા ગ્રામ પંચાયત દ્વારા કચરાના કલેક્શન માટે ડોર ટુ ડોર નિયમિત પણે વાહન મોકલવામાં આવતું જ હોય છે. તેમ છતાં આ વાહનમાં કચરો આપવાના સ્થાને કેટલાક લોકો દ્વારા જાહેરમાં નાંખી ગંદકી ફેલાવવામાં આવી રહી છે.
થાલામાં નહેરની પાળ ઉપર જ્યાં કચરો નાંખવામાં આવી રહ્યો છે તે સ્થળની આજુબાજુમાં પશુઓ પણ ઘાસ ચારો ચરતા હોય છે. તેવામાં પશુઓના આરોગ્ય સામે પણ ખતરો ઉભો થવા પામ્યો છે. બીજી તરફ નહેરના પાણીમાં પણ પ્લાસ્ટીકનો કચરો જતા નુકશાન થઈ રહ્યું છે.
ત્યારે નહેરની પાળ ઉપર આ રીતે જાહેરમાં પ્લાસ્ટીકનો કચરો નાંખી ગંદકી ફેલાવી બેજવાબદાર ભયું વર્તન કરનારાઓ પર ગ્રામ પંચાયત દ્વારા વોચ રાખી કાયદેસરના પગલા ભરી આ રીતે જાહેરમાં ગંદકી ફેલાતી બંધ થાય તે દિશામાં કામગીરી કરવામાં આવે તેવી માંગ ઉઠવા પામી છે.