હાઈવે અને શહેરમાં રોડો ઉપર પડેલા ખાડા વારંવાર અકસ્માત સર્જી રહ્યા છે
(વર્તમાન પ્રવાહ વાપી બ્યુરો)
વાપી, તા.07: વાપી સહિત વલસાડ જિલ્લામાંચોમાસાની અતિવૃષ્ટિએ રોડોની તારાજી સર્જી દીધી છે. હાઈવે હોય કે શહેર કે ગામડાઓના આંતરિક રોડો હોય તમામ રોડો ઉપર ખાડાઓનું સામ્રાજ્ય પથરાઈ ચૂકેલું. પરિણામે અકસ્માતો સર્જાતા રહે છે. તેવો વધુ એક અકસ્માત વાપી યુપીએલ પુલના સર્વિસ રોડ ઉપર ગતરોજ સાંજે સર્જાયો હતો. રોડ ઉપરથી પસાર થઈ રહેલો ટેમ્પો મસમોટા ખાડામાં પટકાતા ટેમ્પો પલટી મારી ગયો હતો.
વાપી યુપીએલ સર્વિસ રોડ સહિત વાપીમાંથી પસાર થતા હાઈવેના સર્વિસ રોડો ઉપર બેસુમાર ખાડા પડી ગયા છે. બલીઠા મામલતદાર કચેરીથી પીટીસી કોલેજ સુધી તાજેતરમાં મહિના પહેલા બનાવેલ રોડ તથા પેટ્રોલ પમ્પથી ચાર રસ્તા સુધીનો રોડ તેમજ બીજી તરફનો સર્વિસ રોડ, વૈશાલી પુલ નીચેના અંડરપાસ સહિતના તમામ રોડો ઉપર ખાડેખાડા પડી ચૂક્યા છે. તેવા યુપીએલ પુલ પાસેના સર્વિસ રોડ ઉપર પડેલા તોતિંગ ખાડામાં ટેમ્પો પટકાતા સ્થળ ઉપર જ પલટી મારી ગયો હતો. જો કે સદનસીબે ચાલક કુદી પડતા કોઈ જાનહાની થવા પામી નહોતી.
