(વર્તમાન પ્રવાહ ન્યુઝ નેટવર્ક)
સેલવાસ, તા.11 : દાદરા નગર હવેલી કોંગ્રેસ ફ્રન્ટલ ઓર્ગેનાઇઝેશન દ્વારા બહુજન સમાજ પાર્ટીના લોકસભા-2024ના ઉમેદવાર શ્રી સંદીપ બોરસાએ પોતાના સમર્થકો સાથે વિધિવત રીતે કોંગ્રેસ પાર્ટીમાં પ્રવેશ કર્યો છે. દાનહ કોંગ્રેસ ફ્રન્ટલ ઓર્ગેનાઇઝેશન દ્વારા કોંગ્રેસ પ્રભારી શ્રી માણિકરાવ ઠાકરેના નિર્દેશ અનુસાર વાંસદાના ધારાસભ્ય શ્રી અનંત પટેલના માર્ગદર્શન અને ગુજરાત રાજ્યના કોંગ્રેસ પ્રભારી શ્રીમતી ઉષા નાયડુ સાથે વલસાડ-ડાંગના પૂર્વ સાંસદ શ્રી કિશન પટેલની ઉપસ્થિતિમાં શ્રી સંદીપ બોરસાની સમગ્ર ટીમને ખેસ પહેરાવી વિધિવત રીતે કોંગ્રેસ પાર્ટીમાં પ્રવેશ કરાવ્યો હતો. આ અવસરે દાનહ કોંગ્રેસ ફ્રન્ટલ ઓર્ગેનાઇઝેશન એસ.ટી.સેલ, એસ.સી. સેલ, માઇનોરિટી સેલ, સેવાદળ, યુવા કોંગ્રેસના પદાધિકારીઓ ઉપસ્થિત રહ્યા હતા.
અત્રે ઉલ્લેખનીય છે કે કોંગ્રેસ પાર્ટીના કાર્યકારી પ્રદેશ પ્રમુખ શ્રી મહેશ શર્મા અને એમની ટીમ દ્વારા લોકસભાની ચૂંટણી દરમ્યાન ચૂંટણીમાં ઉભા રહેલ ઉમેદવારને સંપૂર્ણ સહયોગ આપ્યો ન હતો, જેથી તેઓ નારાજ થઈ કોંગ્રેસ કમિટી સભ્ય શ્રી પ્રભુભાઈ ટોકીયાની ટીમ સાથે જોડાઈ ગયા હતા અને હાલમાંઆ બહુજન સમાજ પાર્ટીના લોકસભાના ઉમેદવાર શ્રી સંદીપ બોરસા અને એમની ટીમ ફરી કોંગ્રસ ફ્રન્ટલ ઓર્ગેનાઇઝેશનની ટીમ સાથે જોડાતા કોંગ્રેસમાં ત્રીજો મોરચો રચાયો હોવાનું સમજાય છે.