(વર્તમાન પ્રવાહ વાપી બ્યુરો)
વાપી, તા.24: વાપી સહિત વલસાડ જિલ્લામાં રખડતા ઢોરોનો ત્રાસ અક્ષમ્ય બની ચૂક્યો છે. વાપી, વલસાડ, ધરમપુરમાં રખડતા ઢોરોના હુમલાના બનાવો તાજેતરમાં બની ચૂક્યા છે. તેવો વધુ એક બનાવ વાપીપાસે આવેલ છીરી ગામમાં બન્યો હતો. બે યુવાનો શાંત ઉભેલી બે ગાયની પાસેથી માત્ર પસાર થઈ રહ્યા હતા ત્યારે અચાનક એક ગાય દોડી આવીને યુવાનોને જાણે શિકાર બનાવ્યા હોય તેમ સીંગડાથી બન્ને યુવાનોને હુલાડી મુક્યા હતા. યુવાનો માંડ માંડ બચી ભાગી છૂટતા જીવ બચ્યા હતા.
વાપી શહેરમાં રખડતા ઢોરોનો ત્રાસ જાણે આમ વાત બની ચૂકી છે. જાહેર રોડ ઉપર અડીંગો લગાડી દેવો, ટોળાબંધ ઉભા રહીને ટ્રાફિક જામ કરવો તેવા દૃશ્યો વાપીમાં રોજીંદાના છે. પાલિકા દ્વારા આ આખો ગંભીર મામલો નજર અંદાજ કરાઈ રહ્યો છે. કોઈ મોટી જીવલેણ ઘટના ઘટવાની રાહ જોવાઈ રહી છે. બહુ હોબાળો થાય એટલે માત્ર દેખાવ પુરતી રખડતા ઢોરોને પકડવાની કાર્યવાહી થાય બાદમાં રાબેતા મુજબ ભીનું સંકેલાઈ જતું આજદિન સુધી જોવા મળ્યું છે. રખડતા ઢોરોનો વધુ જુલમ તો બલીઠા હાઈવેથી વૈશાલી ચોકડી સુધીના બન્ને સર્વિસ રોડો ઉપર રોજીંદો છે. પાલતુ પ્રાણીઓને છોડી દેવાય છે અને સાંજે એકત્રીત કરાય છે. આ ઢોર સાંજના પીકઅવરમાં ટ્રાફિકને બાનમાં લેતા હોવાના દૃશ્યો રોજીંદા છે. આપણે માત્ર દર્શક બની જોઈ રહેવાનું અને સહન કરવાનું એવી સ્થિતિ સામાન્ય નાગરિકોની છે.