ધારાસભ્યના માર્ગદર્શન હેઠળ વલસાડ કલેક્ટર-સિવિલ સપ્લાય સુધી ફરિયાદ કરાઈ
(વર્તમાન પ્રવાહ વાપી બ્યુરો)
વાપી, તા.08: ધરમપુરની એચ.પી. ગેસ એજન્સીની છેલ્લા એક મહિનાથી લાલીયાવાડી ચાલી રહી છે. કલાકો સુધી લાઈન લગાવો તો પણ ગેસ સિલેન્ડર નહી મળતું હોવાથી મામલો ગરમાયો છે. આજે ધારાસભ્ય અનંત પટેલનામાર્ગદર્શન હેઠળ એચ.પી. ગેસ એજન્સી વિરૂધ્ધ વલસાડ કલેક્ટર તથા સિવિલ સપ્લાય અધિકારીને લેખિત ફરીયાદ કરવામાં આવી હતી.
ધરમપુરમાં કાર્યરત એચ.પી. ગેસ એજન્સી દ્વારા સમયસર ગેસના સિલેન્ડર આપવામાં આવી રહ્યા નથી. લોકો કલાકો સુધી લાઈનમાં ઉભા રહે છે પરંતુ સ્થિતિ ઠેર ની ઠેર છે. એજન્સી તરફથી ઉડાઉ જવાબ આપવામાં આવે છે કે ઉપરથી સપ્લાય નથી આવતો. છેલ્લા બે ત્રણ અઠવાડીયાથી ગેસ સિલેન્ડરની ભારે રામાયણ ચાલી રહી છે. મોંઘવારીના સમયમાં આમ સામાન્ય આદિવાસી જેમ તેમ કરી સિલેન્ડરના પૈસા ભેગા કર્યા હોય પણ બીજી તરફ સિલેન્ડર મળતા નથી તેથી ધરમપુર તા.પં.ના સભ્ય કલ્પેશભાઈ પટેલ ગેસ એજન્સીમાં લેખિત ફરિયાદ કરી ગેસ સિલેન્ડરની સમસ્યા નહી ઉકેલાય તો લોક આંદોલન કરી એજન્સી બંધ કરાવવાની ચિમકી પણ ઉચ્ચારી હતી.
