(વર્તમાન પ્રવાહ ન્યુઝ નેટવર્ક)
સેલવાસ, તા.17 : ગુજરાત નેશનલ લૉ યુનિવર્સિટી સેલવાસ સહિત દેશની પ્રતિષ્ઠિત નેશનલ લૉ યુનિવર્સિટીઓમાં પ્રવેશ મેળવવા ઈચ્છુક વિદ્યાર્થીઓ માટે આવશ્યક એવા કોમન લૉ એડમિશન ટેસ્ટ(CLAT) માટે નોંધણી કરવા માટેની તારીખ સત્તાધિશો દ્વારા વિદ્યાર્થીઓના હિતને ધ્યાનમાં રાખી આગામી 22મી ઓક્ટોબર સુધી લંબાવવામાં આવી છે. હવે વિદ્યાર્થીઓ 22 ઓક્ટોબર, 2024ના રાત્રિના 11:59 વાગ્યા સુધી ઓનલાઈન નોંધણી કરાવી શકશે.
ઓનલાઈન અરજી કેવી રીતે કરવી તે વિશે નિઃશુલ્ક માર્ગદર્શન માટે કેન્દ્ર શાસિત પ્રદેશ દાદરા નગર હવેલી અને દમણ-દીવના વિદ્યાર્થીઓ સેલવાસના આમલી સ્થિત ગુજરાત નેશનલ લૉ યુનિવર્સિટી(જીએનએલયુ) કેમ્પસની મુલાકાત લઈ શકે છે.
અત્રે ઉલ્લેખનીય છે કે ગુજરાત નેશનલ લૉ યુનિવર્સિટી-સેલવાસ કેમ્પસમાં બી.એ. એલ.એલ.બી. અને એલ.એલ.એમ. અભ્યાસક્રમોમાં 25 ટકા બેઠકો કેન્દ્ર શાસિત પ્રદેશ દાદરા નગર હવેલી અને દમણ-દીવના વિદ્યાર્થીઓ માટે આરક્ષિત છે. ઉપરાંત, કોમન લૉ એડમિશન ટેસ્ટ(CLAT) માટે નોંધણી કરાવી હોય તેવા સંઘપ્રદેશના વિદ્યાર્થીઓ માટે નિઃશુલ્ક કોચિંગ ક્લાસનું પણ આયોજન કરવામાં આવશે અનેનિઃશુલ્ક વાંચન સામગ્રી પણ આપવામાં આવશે.
અત્રે યાદ રહે કે, કોમન લૉ એડમિશન ટેસ્ટ(CLAT) આગામી તારીખ 01 ડીસેબર, 2024ના રોજ યોજાનાર છે.