ઝડપાયેલ આરોપી સંજય ઉર્ફે દોલસિંહ ઉનીયા ડીડોર
ગુજરાત-રાજસ્થાનમાં 13 જેટલી ચોરી કરી ચૂક્યા છે
(વર્તમાન પ્રવાહ વાપી બ્યુરો)
વાપી, તા.18: વાપી ભર બજારમાં આવેલ ઈબ્રાહિમ માર્કેટમાં ચાર દુકાનોના તાળા તૂટયા હતા. જેમાં અલગ અલગ દુકાનોમાંથી લાખોની રોકડ ચોરી થયાની પોલીસ ફરિયાદ નોંધાઈ હતી. ગયા સપ્તાહમાં બનેલા ચોરીના બનાવનો ભેદ એલ.સી.બી.એ ગણતરીના દિવસોમાં ઉકેલી આરોપી ચોરને મોરાઈ રેલવે ફાટકથી આબાદ રીતે ઝડપી પાડતા ચોરીનો ભેદ ઉકેલવામાં પોલીસને સફળતા મળી છે.
વાપી સ્થિત ઈબ્રાહીમ માર્કેટમાં કાર્યરત મહાવીર પ્લાસ્ટીક રોકડા રૂપિયા 1 લાખ, કાકાજી ફેબ્રિકેશનમાં 40 હજાર, ફેશનમાં 1 લાખ અને તસુમ્બીયા મેચીંગ સેન્ટરમાં રોકડાની ચોરી થયાની ફરિયાદ ટાઉન પોલીસમાં નોંધાવાઈ હતી. એલ.સી.બી.એ તપાસ હાથ ધરી હતી. પી.આઈ. ઉત્સવ બારોટ, એ.એસ.આઈ. અલ્લારખાને બાતમી મળી હતી. આરોપી મોરાઈરેલવે ફાટક આવવાનો છે તેથી વોચ ગોઠવી હતી તે દરમિયાન આરોપી સંજય ઉર્ફે દોલસિંહ ઉનીયા ડિડોર આવી પહોંચતા પોલીસે ઝડપી પાડયો હતો. પોલીસ ઈન્ટેલીજન્સે જાળ બિછાવેલી હતી. આરોપી પાસેથી રોકડા રૂપિયા 3500 તથા ચોરીના સાધનો જપ્ત કર્યા હતા. આરોપીની ધરપકડ કરી વધુ પુછપરછ કરતા આરોપીએ 13 જેટલી ચોરી રાજસ્થાન, ગુજરાતમાં કરી હોવાની કબુલાત કરી હતી. પોલીસને ઈબ્રાહીમ માર્કેટની ચોરીનો ભેદ ઉકેલવામાં સફળતા મળી છે.