રાત્રે સાયકલો ચોરીને એ દુકાનના ખાંચામાં સંતાડી હતી : સ્થાનિકોએ સવારે સાયકલ લેવા આવતા ઝડપ્યા
(વર્તમાન પ્રવાહ વાપી બ્યુરો)
વાપી, તા.19: હાલમાં વરસાદની સિઝન પુરબહારમાં ચાલી રહી છે તેથી તસ્કરો માટે જાણે સિઝન ખુલી હોય તેમ ચોરીઓ કરવાની અવનવી તરકીબો શોધી ચોરી કરવા નિકળી પડે છે. કંઈક તેવી ઘટના વાપી ચલા ચોકી ફળીયામાં બની હતી. ગ્રામજનોએ સાયકલ ચોર ઝડપી પાડી પોલીસને હવાલે કર્યા હતા.
ચલા ચોકી ફળીયા વિસ્તારમાંથી જુદી જુદી જગ્યાએથી સાયકલો ચોરી ચોરટાઓએ એક અવાવરૂ દુકાનની અંદર સંતાડી દીધી હતી. આજે સવારે ચોરો સાયકલ લેવા આવી પહોંચ્યા હતા ત્યારે સ્થાનિક લોકોની સતર્કતા અને સમયસુચકતા આધિન બે સાયકલ ચોરને રંગે હાથ પકડી લીધા હતા તેમજ એક ભાગી છુટવામાં સફળ રહ્યો હતો. લોકોએ પોલીસને ફોન કરતા પોલીસ ઘટના સ્થળે દોડી આવી હતી. મુદ્દામાલ તરીકે ચોરેલી સાયકલો અને ઝડપાયેલ બે આરોપીઓનો કબજો લઈનેકાયદેસરની કાર્યવાહી કરી હતી.
