(વર્તમાન પ્રવાહ વાપી બ્યુરો)
વાપી, તા.18: તા.16 – પારડી વલ્લભ સંસ્કારધામ ડે – બોર્ડિંગ શાળાની વિદ્યાર્થીનીઓ અંડર-19 સી.બી.એસ.સી. ક્લસ્ટર-13 વોલીબોલ સ્પર્ધામાં સતત પાંચમાં વર્ષે વિજેતા થઈ શાળાનું ગૌરવ વધાર્યું હતું. આ સ્પર્ધા તારીખ 1 થી 5 ઓકટોબર સુધી દિલ્હી પબ્લિક સ્કૂલ આણંદ (વડતાલ) ગુજરાત મુકામે યોજાઈ હતી. જેમાં દક્ષિણ ગુજરાતની 19 શાળાની વિદ્યાર્થીનીઓએ ભાગ લીધો હતો.આ સ્પર્ધા ડે બોર્ડિંગ શાળાની વિદ્યાર્થીનીઓ અને ડી.પી.એસ. બોપલ શાળાની વિદ્યાર્થીઓ વચ્ચે યોજાઈ હતી. જેમાં ભારે રસાકસી વચ્ચે શ્રી વલ્લભ સંસ્કારધામ ડે બોર્ડિગ શાળાની વિદ્યાર્થીનીઓએ ભવ્ય વિજય પ્રાપ્ત કરી શાળાનું ગૌરવ વધાર્યું હતું. વિજેતા શાળાની વિદ્યાર્થીનીઓના ગૃપને ટ્રોફી, મેડલ તેમજ સર્ટિફિકેટ એનાયત કરાયા હતા. સમગ્ર ટીમે લગાતાર પાંચ વર્ષ વિજેતા જાહેર થઈ એક ઈતિહાસ રચ્યો હતો. જેની ખુશીમાં શાળાના ટ્રસ્ટીઓ તથા આચાર્યશ્રીએ અભિનંદન પાઠવી ભવિષ્યમાં પણ આવા જ પ્રદર્શનની અપેક્ષા વ્યક્ત કરી હતી.
