(વર્તમાન પ્રવાહ વાપી બ્યુરો)
વાપી, તા.14
વલસાડ જિલ્લામાં બારે મેઘ ખાંગા થયા છે ત્યારે અતિવૃષ્ટી અનેક જગ્યાએ ખાનાખરાબી તારાજી સર્જી રહેલ છે. ધરમપુરના દુલસાડ ગામે સોમવારે રાત્રે 9.00 વાગ્યાના સુમારે એક મકાન ભારે વરસાદને પગલે તૂટી પડયું હતું. દુર્ઘટનામાં મકાનના કાટમાળમાં દટાયેલી વૃદ્ધાનું ગંભીર ઈજાઓને લઈ મોત નિપજ્યું હતું.
પ્રાપ્ત વિગતો મુજબ ધરમપુરના દુલસાડ ગામે નાયકી ફળિયામાં ગત રાત્રે ભારે પવન સાથે વરસી રહેલા વરસાદમાં એક કાચુ મકાન તુટી પડયું હતુ. રાત્રે 9 વાગ્યાના સુમારે ઘરમાં ગજરાબેન (ઉ.વ.75) નામની મહિલા વાળુ કરી રહ્યા હતા ત્યાં તેમની ઉપર મકાનનો કાટમાળ તુટી પડયો હતો. જેમાં ગંભીર ઈજાઓ પહોંચતા ગજરીબેનનું ઘટના સ્થળે જ કરુણ મોત નિપજ્યું હતું. પડોશીઓ દોડી આવ્યા હતા પરંતુ સમય વીતી ગયો હતો. વૃદ્ધાએ દમ તોડી દીધો હતો.
