દુણેઠાના જયેશ નાનુ પટેલને કોઈ વાતે વાંકુ પડતાં પાર્ટી છોડી પોતાના 20 થી 25 જેટલા સાગરિતો સાથે આવી ગૌતમ પટેલ અને તેમના મિત્રો ઉપર કરેલો ઘાતક હૂમલોઃ રોકડા અને ચેઈનની પણ તફડંચી
(વર્તમાન પ્રવાહન્યુઝ નેટવર્ક)
દમણ, તા. 15
નાની દમણના કોલેજ રોડ ઉપર ફોરર્ચ્યુન વર્લ્ડ એપાર્ટમેન્ટ ખાતે ખાવા-પીવાની પાર્ટી ઉપર સાથે બેઠેલા એક શખ્સે પોતાના 20 થી 25 જેટલા સાગરિતો સાથે આવી પોતાના મિત્રો ઉપર જ કરાવેલા ઘાતક હૂમલાની ઘટના સમગ્ર પ્રદેશમાં ટોક ઓફ ધ ટાઉન બનવા પામી છે અને પ્રશાસક પ્રફુલભાઈ પટેલના રાજમાં ભાઈગીરી સદંતર બંધ થવી જોઈએ એવી લાગણી પણ વ્યક્ત થઈ રહી છે.
પ્રાપ્ત માહિતી પ્રમાણે ફરિયાદી ગૌતમ કાન્તિભાઈ પટેલ રહે.સડક ફળિયા આમલીયા-ડાભેલ, નાની દમણ પોતાના મિત્રો સાથે ફોરર્ચ્યુન વર્લ્ડ એપાર્ટમેન્ટ કોલેજ રોડ નાની દમણ ખાતે ખાવા પીવા માટે પાર્ટી ઉપર બેઠા હતા. જેમાં નાની દમણ દુણેઠાનો જયેશ નાનુ પટેલ પણ સામેલ હતો. દરમિયાન કોઈ વાતે વાંકુ પડતાં જયેશ પટેલ પોતે પાર્ટી છોડીને ચાલી ગયો અને પોતાની સાથે 20 થી 25 જેટલા સાગરિકોની સાથે આવી ફરિયાદી ગૌતમ કાન્તિભાઈ પટેલ અને તેમના મિત્ર જીનલ બાબુ પટેલ, કિરણ ઉર્ફે છનિયો બાબુ પટેલ, કૃપેશ કામલી, કૃષાંગ હરેશ, અશ્વિન જગુ પટેલ ઉપર અચાનક લોખંડ અને લાઠી જેવા હથિયારથી હૂમલો કરી ફરિયાદીના જમણાં હાથ અને જમણી આંખ તથા આંખની આજુબાજુ ઈજા પહોંચાડવાની સાથે તેમના મિત્રોને પણ મારી ઘાયલ કર્યા હતા. ફરિયાદીના ખિસ્સામાંથીરોકડા રૂા.6000 તથા ગળામાં પહેરેલી 7 તોલાની ચેઈન પણ આરોપી દ્વારા છીનવી લેવામાં આવી હોવાની ફરિયાદ નોંધવામાં આવી છે. જયેશ નાનુ પટેલ અને તેમના મિત્રો દ્વારા ફરિયાદીને જાનથી મારી નાંખવાની ધમકી આપી હૂમલો કરી ઘટના સ્થળથી ભાગી ગયા હતા. આ સંદર્ભમાં નાની દમણ પોલીસ સ્ટેશને આઈપીસીની 397, 506(2), આર/ડબ્લ્યુ 34 તથા 1860 અંતર્ગત ગુનો નોંધની વધુ તપાસ આરંભી છે.
