છેલ્લા કેટલાક દિવસથી મોબાઈલ સ્નેચીંગ ગેંગ સક્રિય છેઃબુધવારે જે-ટાઈપમાં નોકરી જઈ રહેલ સંજય પઢીયારનો મોબાઈલ ઝૂંટવી ફરાર
(વર્તમાન પ્રવાહ વાપી બ્યુરો)
વાપી, તા.08
વાપી વિસ્તારમાં છેલ્લા કેટલાક દિવસથી રાહદારીઓના મોબાઈલ ઝૂંટવતી ગેંગ સક્રિય બનતા એલ.સી.બી. એકશનમાં આવી ગઈ કાલે મોબાઈલ ઝૂંટવતી ગેંગના ત્રણ આરોપીઓનો ઝડપી લીધા હતા તેમ છતાં આજે બુધવારે ફાટકથી ચાલીને જે-ટાઈપ કંપનીમાં નોકરી જઈ રહેલ યુવકનો મોબાઈલ એક્ટિવા ઉપર આવેલ બે ઈસમો ઝૂંટવી ફરાર થઈ ગયા હતા.
વાપી વિસ્તારમાં મોબાઈલ ઝૂંટવતી ગેંગના ત્રણ આરોપીને એલ.સી.બી.એ પકડી પાડી 10 મોબાઈલ અને બે બાઈક મુદ્દામાલમાં જપ્ત કર્યા હતા. ઝડપાયેલ આરોપી વિશાલ રહે.કોળીવાડ, મૂળ દહાણું, સંકેત સંતોષ સહાની રહે.વાપી કોળીવાડ મૂળ રહે.ગોરેગાંવ તથા અરૂણઉર્ફે વરૂણ રોશન આઉજી (નેપાલી) રહે.નૂતનનગર-બલીઠાની ધરપકડ કરી પોલીસે 10 મોબાઈલ અને બે બાઈક જપ્ત કર્યા હતા.
ગેંગના ઝડપાયાના બીજા જ દિવસે આજે બુધવારે સવારે 8 વાગ્યાના સુમારે ફાટક ઉતરીને જે-ટાઈપ કંપનીમાં ચાલીને નોકરી જઈ રહેલ સંજય પઢીયાર નામના યુવકના હાથમાં રહેલો મોબાઈલ એક્ટિવા ઉપર આવેલા બે યુવાનો ઝૂંટવીને ફરાર થઈ ગયા હતા.
