(વર્તમાન પ્રવાહ વાપી બ્યુરો)
વાપી, તા.08
પોલીસ કાયદો અને વ્યવસ્થા જાળવવા સદાય તત્પર હોય છે તે અનુસાર વાપી ટાઉન પોલીસમાં બલીઠાના એક યુવકે બોગસ ફોન કરીને પોલીસને દોડતી કરી હતી. યુવકે ફોન કરેલો કે કંપનીમાં ચૂંટણી દારૂની મહેફીલ ચાલી રહી છે. પોલીસ કંપનીમાં પહોંચી તો કંપનીમાં રજા હોવાથી કોઈ મહેફીલ જોવા મળેલી નહીં તેથી બોગસ ફોન કરનાર યુવકને પોલીસે ઝડપી પાડી જેલ ભેગો કર્યો હતો.
પ્રાપ્ત વિગતો અનુસાર વાપી ટાઉન પી.આઈ. બી.જે.સરવૈયા ઉપર ગત રવિવારે એક યુવાનનો ફોન આવ્યો હતો. યુવાને પોલીસને માહિતી આપી હતી કે આલોક કંપનીમાં ચૂંટણીલક્ષી દારૂની મહેફીલચાલી રહી છે. તેથી પી.આઈ. સરવેયા સ્ટાફ સાથે કંપનીમાં રેડ કરવા દોડી ગયા હતાં. સ્થળ પર તપાસ કરતા જાણવા મળેલું કે રવિવાર છે તેથી કંપની બંધ છે. માત્ર સિકયોરીટી ગાર્ડ જ ફરજ પર હતો તેથી પોલીસને ખ્યાલ આવી ગયો કે ફોન બોગસ છે.પોલીસે નંબરવાળા સીમકાર્ડ આધારે બલીઠાના કોળીવાડમાં રહેતો હિતેશ નવીનભાઈ કોળીપટેલની ધરપકડ કરી આઈપીસી 89 મુજબ કાયદેસરની કાર્યવાહી કરી હતી.
