(વર્તમાન પ્રવાહ ન્યુઝ નેટવર્ક)
પારડી, તા.14
‘‘ઘાયલ કી ગત ઘાયલ જાને” જ્યારથી પારડી નગરપાલિકામાં એસસી અને એસટી પ્રમુખ-ઉપપ્રમુખ બન્યા છે ત્યારથી હંમેશા દબાઈને અને ડર ઉદ્દભવતા સફાઈ કર્મીઓને પાંખ ઉગી છે. તેઓ હવે ખુલીને પોતાની વ્યથા પ્રમુખ-ઉપપ્રમુખને જણાવી રહ્યા છે.
ઠંડીની સીઝનમાં સૌ કોઈ વહેલી સવારે પથારીમાં ઓઢીને સૂતા હોય છે ત્યારે આવી કડકડતી ઠંડીની પરવા કર્યા વિના નગરને સ્વચ્છ અને સુઘડ બનાવવા પોતાની ફરજ પૂર્ણ કરવા વહેલી સવારથી સફાઈ કર્મીઓ સમગ્ર નગરની ગંદકીઓ દૂર કરી આપણા જાગ્યા પહેલા નગરને સ્વચ્છ બનાવી દેતા હોય છે.
હરેક મનુષ્યને ઋતુની અસર થતી જ હોય છે ત્યારે આવી ઠંડીથી થોડી રાહત મળે તે માટે આ સફાઈ કર્મીઓએ પાલિકા પ્રમુખ-ઉપપ્રમુખ આગળ સ્વેટરની માંગ કરી હતી અને તેઓની વ્યથાસમજતા પ્રમુખ-ઉપપ્રમુખે સામાન્ય સભામાં ઠરાવ કરી આજરોજ તમામ 43 જેટલાસ્ત્રી-પુરૂષ સફાઈ કર્મીઓને સ્વેટરનું વિતરણ કરી તેઓને આવી ઠંડીમાં રાહત મળે એવુ સરાહનીય કાર્ય કર્યું હતું.