પાડોશીએ પંખાએ લટકતી જોઈ હોસ્પિટલ લઈ જતાં ફરજ પરના ડોકટરે મૃત જાહેર કરી
(વર્તમાન પ્રવાહ ન્યુઝ નેટવર્ક)
પારડી, તા.16
પારડી તાલુકાના ખડકી ગામે વચલુ ફળિયું ખાતે રહેતા ગણેશભાઈ બાલુભાઈ પટેલની 17 વર્ષની દીકરી મોહિની રેટલાવ ખાતે સીવણ ક્લાસ કરતી હતી. બુધવારે સવારે દસ વાગે સીવણ કલાસ ગયા બાદ તેના પિતાએ મોહિનીને ફોન કરતા ફોન સ્વીચ ઓફ આવ્યોહતો. મોડી સાંજે પાંચેક વાગ્યે પહોંચેલી મોહિનીએ ‘મોબાઈલ ફોન કેમ બંધ રાખ્યોહતો?’નો ઠપકો પિતાએ આપતાં મોહિનીને માઠું લાગી આવ્યું હતું. જેને લઈ આજરોજ માતા પિતા સવારે નોકરી પર ગયા બાદ તેણીએ ઘરના પંખા સાથે દુપટ્ટો બાંધી ફાંસો ખાઈ આત્મહત્યા કરી લીધી હતી.
પડોશમાં રહેતી ભૂમિકા નામની યુવતી તેમના ઘરે જતા મોહિનીને ફાંસો ખાઈ લટકેલી હાલતમાં જોતા તાત્કાલિક તેને નીચે ઉતારી આજુબાજુ રહેતા લોકો સાથે બાઈક પર સારવાર માટે પારડી મોહનદયાળ હોસ્પિટલ લઈ જવાતા ફરજ પરના તબીબે મોહિનીને મૃત જાહેર કરી હતી.
બનાવની જાણ પારડી પોલીસ મથકે કરવામાં આવતા બીટ જમાદાર અજીતભાઈ તાત્કાલિક ઘટના સ્થળે પહોંચી લાશનો કબજો લઈ પીએમ કરાવી વધું કાર્યવાહી હાથ ધરી છે.