જિલ્લાના બે હજાર ઉપર બેંક કર્મચારીઓ હડતાલ-પ્રદર્શનમાં જોડાયા
(વર્તમાન પ્રવાહ વાપી બ્યુરો)
વાપી, તા.16
દેશની કેટલીક રાષ્ટ્રિયકૃત બેંકનું ખાનગીકરણ કરવા માટે સરકાર ચાલુ સંસદીય છત્રમાં બિલ લાવી રહી છે. જેનો વિરોધ નોંધાવવા દેશભરના બેંક કર્મચારીઓએ આજે હડતાલ પાડી હતી. વલસાડ તિથલ રોડ બેંક ઓફ બરોડા પાસે વલસાડ જિલ્લાના બેંક કર્મચારીઓ હડતાલ પર બેસીને બેંક ખાનગીકરણ બિલનો વિરોધ નોંધાવ્યો હતો.
ભારતભરમાં આજે 16 ડિસેમ્બરે સરકાર દ્વારા રાષ્ટ્રિયકૃત બેંકોનું ખાનગીકરણ કરવાનું બિલ સંસદમાં લાવી રહી છે ત્યારે બેંક કર્મચારીઓ હડતાલ પાડી વિરોધ દર્શાવ્યો હતો. દેશના 9 લાખ ઉપરાંતરાષ્ટ્રિયકૃત બેંકના કર્મચારીઓ હડતાલમાં જોડાયા હતા. જ્યારે વલસાડ જિલ્લાની રાષ્ટ્રિયકૃત બેંકના કર્મચારીઓ પણ આ હડતાલમાં જોડાયા હતા. 2 હજાર ઉપરાંત કર્મચારીઓએ આજે હડતાલ પાડી હતી. વલસાડ તિથલ રોડ બેંક ઓફ બરોડાની શાખા સામે બેસીને દેખાવો યોજ્યા હતા. બેંકોના કર્મચારીઓનું કહેવું છે કે, સરકારી બેંકો નાનામાં નાના લોકોની સેવા વ્યાજબી દરોથી કરે છે. ખાનગીકરણ થશે તો બેંક સેવાના દરો વધશે. ઝીરો બેલેન્સથી રાષ્ટ્રિયકૃત બેંકોએ લાખો જનધન ખાતા ખોલ્યા છે.