વલસાડઃ તા.૨૯: પોષણ અભિયાન અંતર્ગત સ્વસ્થ બાળક ની ઓળખ અને ઉજવણી ઉપર ભાર મૂકવાના હેતુસર સ્વસ્થ બાળક સ્પર્ધાનું આયોજન કરવામાં આવ્યું છે. જેના ભાગરૂપે પોતાના બાળકોની આરોગ્ય અને પોષણની સ્થિતિ સુધારવા માટે માતા-પિતા/ વાલીઓમાં સ્પર્ધાત્મક લાગણી ઉત્પન્ન થાય અને કૉમ્યુનિટી મોબિલાઇઝેશન તેમજ લોકોમાં જાગૃતિ લાવવાના ખ્યાલ સાથે, ૦ થી ૬ વર્ષના બાળકો માટે તા.૮ જાન્યુઆરી થી ૧૪ જાન્યુઆરી ૨૦૨૨ સુધી સ્વસ્થ બાળક સ્પર્ધા સમગ્ર ભારતમાં યોજવામાં આવશે.
આ સ્પર્ધા કાર્યક્રમમાં વલસાડ જિલ્લાના શહેરી અને ગ્રામ્ય વિસ્તારના તમામ ૦-૬ વર્ષના બાળકો માટે જિલ્લાની આંગણવાડી કેન્દ્રો, ઘર, પંચાયત, શાળાઓ, ખાસ શિબિરો, પી.એચ.સી જેવા સ્થળો ઉપર સ્પર્ધાનું આયોજન કરવામાં આવશે. પોષણ ટ્રેકર એપ ઉપર ઓનલાઈન મોડયુલ સ્પર્ધા માટેનું પ્લેટફોર્મ રહેશે.
સ્વસ્થ બાળક સ્પર્ધા અંતર્ગત સેલ્ફ મોડમાં પણ ૨ થી ૬ વર્ષની વયના બાળકો માટે ઉપલબ્ધ રહેશે. માતા-પિતા/વાલીઓ બાળકની ઘરે બેઠા ઉંચાઈ અને વજન માપી અને ઓનલાઈન એપ્લીકેશન પર ડેટા અપલોડ કરી શકાશે. જો બાળક સ્વસ્થ છે, તો એપ્લીકેશનમાં પ્રમાણપત્ર જનરેટ થશે અને માતા-પિતા/વાલીઓ તેને ડાઉનલોડ કરી શકશે, એમ આઇ.સી.ડી.એસ. વલસાડના પ્રોગ્રામ ઓફિસર દ્વારા જણાવાયું છે.
