સુંદરનગરને અસુંદર બનાવવામાં પંચાયત કે પાલિકાનો જબરદસ્ત સહયોગઃ મુંબઈની ધારાવીનો અહેસાસ કરવો હોય તો સુંદરનગરની મુલાકાત લ્યો
(વર્તમાન પ્રવાહ વાપી બ્યુરો)
વાપી, તા.03
વાપીના વિકાસની ચકાચાંદ વાતો સદા જોવા મળે છે. પરંતુ સિક્કાની બીજી બાજુ ભાગ્યેજ લોકો સુધી-પ્રશાસન સુધીપહોંચતી હોય છે. વાત છે. વાપીના ભડકમોરા વિસ્તારમાં આવેલ સુંદરનગર વિસ્તારની. નામ સુંદરનગર છે પણ અહીં અસુંદરતા ઠેર ઠેર ગંદકી, કીચડ, ડુક્કરો વચ્ચે થોકબંધ પથરાયેલી પડી છે. મંગળ ઉપર માનવી પહોંચ્યો પણ અફસોસ વાપી ભડકમોરાના સુંદરનગર સુધી પંચાયત કે પાલિકા જેવી કોઈ એજન્સી પહોંચી હોય તેવી સ્થાનિક દિનદશા જોઈને શબ્દશઃ લાગી રહ્યું છે.
વાપીના વિકાસની ચારેકોર ગુલબાંગો પડધા પાડીને સંભળાવાઈ રહી છે. વાપી વિસ્તારના અમુક સ્લમ વિસ્તારની ચાલીઓની જીંદગી બદથી બદ્દતર છે. ભાગ્યે જ સરકાર કે પ્રશાસને એવા વિસ્તારમાં દસ્તક દીધા હશે. કદાચિત જોવાની પણ તસ્દી નહી લીધી હોય તેનુ જીવંત ઉદારહણ ભડકમોરોનો સુંદરનગર વિસ્તાર છે. આ વિસ્તારમાં ગંદકી, ડુકકર અને નાક ફાડી નાખે તેવી બદબુ વચ્ચે માનવી શ્વસી રહ્યો છે. લાચારીની ચરમ સિમા એટલે મુંબઈ ધારાવી વિસ્તારનો એક હિસ્સો વાપીમાં વસી રહ્યો છે. તેવા બદએ હાલ સ્થાનિક ચાલીઓમાં રહેતા લોકોના છે. પ્રશાસનના નકશામાં ભડકમોરા સુંદરનગર વિસ્તાર હશે નહી તેવું સ્પષ્ટ અહીંની દારૂણ સ્થિતિ જોઈને અચૂક થઈ રહ્યું છે.