(વર્તમાન પ્રવાહ, ન્યુઝ નેટવર્ક) વાપી(ચલા), તા.24:
વાપી જીઆઈડીસીના સી ટાઈપ વિસ્તારના ભીડભંજન સોસાયટીની સામે, માર્ગની બાજુમાં પાર્કિંગમાં મૂકેલી કારની ઉઠાંતરી તસ્કરો કરી ગયાની ફરિયાદ વાપી ઉદ્યોગનગર પોલીસ મથકમાં નોંધાવા પામી હતી.
વાપી ઉદ્યોગનગર પોલીસ સૂત્રો પાસેથી મળતી વિગત અનુસાર, વાપી જીઆઈડીસી સી ટાઈપ વિસ્તારના ભીડભંજન સોસાયટીમાં મંગળજી ઓખાજી ઠાકોર (ઉં.આ.72 મૂળ રહે. મહેસાણા) પરિવાર સાથે રહે છે. ગત તારીખ 9-1-2022 ના રોજ કાર નં. જીજે-15 સીજે-3526 (કિંમત આશરે 2 લાખ) ને સોસાયટીની સામે, માર્ગની બાજુમાં પાર્કિંગમાં લોક કરીને મૂકી હતી. જે રાત્રીના સમયે તસ્કરોએ કોઈક સાધન વડે વાહનનું લોક ખોલી નકલી ચાવી અથવા ડાયરેકટ ચાલુ કરી કારની ઉઠાંતરી કરી ગયા હતાં. સવારે પાર્કિંગમાં કાર નજરે ન પડતા તેની શોધખોળ આદરી હતી. જે બાદ કોઈ પત્તો ન લાગતા વાપી ઉદ્યોગનગર પોલીસ મથકમાં કાર ઉઠાંતરી થયાની ફરિયાદ નોંધાવી હતી.
