(વર્તમાન પ્રવાહ ન્યુઝ નેટવર્ક)
સેલવાસ, તા.19: દાદરા નગર હવેલીમાં ભારે વરસાદને કારણે રસ્તાઓની હાલત ખુબ જ ખરાબ થઈ ગઈ હોય તેનેતાત્કાલિક રીપેર કરવા માટે સેલવાસ નગરપાલિકાના કાઉન્સિલર શ્રી સુમનભાઈ પટેલે કલેક્ટરશ્રીને લેખિત રજૂઆત કરી છે. જેમાં જણાવ્યા અનુસાર જિલ્લામાં કેટલાક દિવસોથી ધોધમાર વરસાદ પડી રહ્યો છે, જેના કારણે સેલવાસ અને જિલ્લા પંચાયત વિસ્તારમાં ડામર રોડ અને કાચા રોડની હાલત ખુબ જ દયનીય બની જવા પામી છે. જેનાથી વાહન ચલાવનારને ખુબ જ તકલીફનો સામનો કરવા પડી રહ્યો છે. કેટલાક રસ્તાઓ એટલા જર્જરિત છે કે વાહન લઈને પસાર થવું જાણે માઉન્ટ એવરેસ્ટ સર કરવાનો હોય. સેલવાસથી ખાનવેલ મુખ્ય રોડ, રખોલીથી સાયલી તરફ જતો રોડ, ખેરડી ચેકપોસ્ટથી ખાનવેલ તરફ જતો રોડ જે કલા ફાટક સુધી ખુબ જ બદતર હાલતમાં છે. અથાલથી ખરડપાડા થઈ કનાડી ફાટક અને લુહારી તરફ જતો રોડ, ડાંડુલ ફળીયા ચાર રસ્તાથી અથોલા થઈ ઉમરકુઇ જતો રોડ, ડોકમરડી બ્રીજથી વાઘછીપા તરફ જતો મેન રોડ આ રસ્તાઓ પરથી હજારો લોકો પોતાના વાહનો લઈને જતા હોય છે અને ઇન્ડસ્ટ્રીઝ વિસ્તાર હોવાથી 24 કલાક રોડ ચાલુ હોય છે. તેથી આ રસ્તાઓને તાત્કાલિક ધોરણે પ્રશાસન સ્થળ પર જઈ તપાસ કરી વહેલામાં વહેલી તકે રીપેર કરે એવી પાલિકા કાઉન્સિલ શ્રી સુમનભાઈ પટેલ દ્વારા જણાવાયું છે.
