ગોઠણ ગામનો લક્ષ્મણ હરીભાઈ ગબાડી બાઈક ઉપર કપરાડાથી નાનાપોંઢા જઈ રહેલ ત્યારે મોત ભેટયું
(વર્તમાન પ્રવાહ વાપી બ્યુરો)
વાપી, તા.02: કપરાડાના ઘાટ એટલે મોતના ઘાટ બની રહ્યા છે. પ્રતિ સપ્તાહે આ ઘાટો ઉપર ગોઝારા અકસ્માત બનતા રહ્યા છે. આજે શુક્રવારે વધુ એક અકસ્માત સર્જાયો હતો. ઘાટ ઉપર બાઈક સવાર ટારકુન ફળીયા નજીકથી યુવાન પસાર થતો હતો ત્યારે બંધ બોડીનું કન્ટેનર અચાનક પલટી મારી જતા બાઈક સવાર યુવાનનું કન્ટેનર નીચે કચડાઈ જતા ઘટના સ્થળે કમકમાટી ભર્યું મોત નિપજ્યું હતું.
કરુણ અકસ્માતની પ્રાપ્ત વિગતો મુજબ કપરાડા ગોઠણ ગામનો યુવાન લક્ષ્મણ હરીભાઈ ગબાલી તેની બાઈક નં.જીજે 15 એએન 5583 ઉપર સવાર થઈ આજે સવારે કપરાડાથી નાનાપોંઢા જવા નિકળ્યો હતો પરંતુ મોત તેની રાહ જોઈ બેઠયુ હતું. ટારકુન ફળીયા ને.હા.848 થી પસાર થઈ રહ્યો હતો ત્યારે કન્ટેનર નં.આર.જે. 11 જીએ ના ચાલકે સ્ટીયરીંગ પરથી કાબુ ગુમાવતા કન્ટેનર અચાનક પલ્ટી મારી ગયું હતું. જેમાં બાઈક સવાર ઉપર પડતા બાઈકચાલક લક્ષ્મણ ગબાલી કચડાઈ ગયો હતો. આ કરુણ અકસ્માતમાં તેનું ઘટના સ્થળે મોત નિપજ્યું હતું. પોલીસે કન્ટેનર ચાલક શિવચરણ રહે.એમ.પી.ની અટક કરી વધુ તપાસ હાથ ધરી હતી.