પાણી મારવાથી આગ વધુ પ્રસરતી હતી તેથી વાપી નોટિફાઈડ ફાયરે ફોર્મનો મારો ચલાવી આગ બુઝાવી
(વર્તમાન પ્રવાહ વાપી બ્યુરો)
વાપી, પારડી, તા.19: પારડી ને.હા. ઉપર હોટલમાં રાત્રે પાર્ક કરેલ કન્ટેનરમાં મળસ્કે આગ ભભુકતા દોડધામ મચી જવા પામી હતી. કન્ટેનરમાં કેમિકલ પાવડરની બેગ ભરી વાપી જીઆઈડીસીમાં જવાનું હતું ત્યારે ઘટેલી ઘટના.
પ્રાપ્ત વિગતો મુજબ રાજસ્થાનથી કેમિકલ પાવડર બેગો ભરીને કન્ટેનર નં.આરજે 14 જીએન 1819 વાપી જીઆઈડીસી જવા નિકળ્યું હતું. રાત્રે પારડી હાઈવે હોટલ વિરામ સામે ચાલક કન્ટેનર પાર્ક કરી સુતો હતો. મળસ્કે અચાનક કન્ટેનરમાંથી ધુવાડા નિકળતા ગાર્ડ ચાલક અલીને જગાડયો હતો. તેમજ પારડી ફાયરને જાણ કરી હતી. પારડી ફાયર બ્રિગેડે પાણી મારવાનું શરૂ કરતાં આગ વધુ ફેલાવા લાગેલી તેથી નોટિફાઈડ ફાયરને જાણ કરાઈ હતી. નોટિફાઈડ ફાયર બ્રિગેડે ફોર્મનો મારો ચલાવી આગ પર કાબુ કરી લીધો હતો. રસ્તા પરનું કેમિકલ પોલીસે જે.સી.બી. વડે સાફ કરાવ્યું હતું.
