બાજુમાં સ્કૂલ ચાલુ હોવાથી બાળકોની સલામતિ માટે સાવધાની રખાઈ
(વર્તમાન પ્રવાહ વાપી બ્યુરો)
વાપી, તા.09
વાપી ગીતાનગર ટાંકી ફળીયા રોડ ઉપર આજે ગુરૂવારે સવારે દશ વાગ્યાના સુમારે અચાનક એક કાચા મકાનમાં ભિષણ આગ લાગી હતી. આગની ઘટનાને લઈ સમગ્ર વિસ્તારમાં અફરા-તફરીનો માહોલ છવાઈ જવા પામ્યો હતો.
વાપી ટાંકી ફળીયા રોડ ઉપર આવેલ સરદાર પટેલ હાઈસ્કૂલની બાજુમાં આજે સવારે એક કાચા મકાનમાં ભિષણ આગ ભભૂકી ઉઠી હતી. આગની ઘટના બાદ લોકો એકઠા થઈને આગ બુઝાવવા સહિત ફાયર બ્રિગેડને જાણ કરી હતી.
ફાયર બ્રિગેડે ઘટના સ્થળે આવી આગ ઉપર પાણીનો મારો સતત ચલાવતા એકાદ કલાકની જહેમત બાદ આગ ઉપર કાબુ કરી લેવાયો હતો. આગમાં ઘરનો સરસામાન રાચરચિલું બળીને ખાખ થઈ ગયેલ. ઘર સામે પાર્ક કરેલ બે બાઈકો પણ આગમાં બળીને ખાખ થઈ ગઈ હતી. સૌથી વધુ ચિંતા બાજુમાં સ્કૂલ ચાલુ હતી તેથી આગના બનાવને લઈ બાળકોની સલામતિ ખાસ પોલીસે, સ્કૂલે અને લોકોએ સાવધાની દાખવી હતી.
આગમાં અન્ય કોઈ જાનહાની થવા પામેલ નથી પરંતુ આગ શોર્ટ સર્કિટના કારણે લાગી હોવાનું મનાઈ રહ્યું છે.