વર્ષ 2023-’24 માટે ગ્રામ પંચાયત ડેવલપમેન્ટ પ્લાન(જીપીડીપી) ગ્રામજનોની સમક્ષ રજૂ કરી તેને સર્વાનુમતે મંજૂર કરાયો
(વર્તમાન પ્રવાહ ન્યુઝ નેટવર્ક)
દમણ, તા.16 : ગઈકાલ મંગળવાર તા.15મી નવેમ્બરના રોજ ભારત સરકારની ‘સબકી યોજના, સબકા વિકાસ’-ગ્રામ પંચાયત ડેવલપમેન્ટ પ્લાન (જીપીડીપી) અભિયાન અંતર્ગત સરપંચ શ્રી શંકરભાઈ પટેલની અધ્યક્ષતામાં કડૈયા ગ્રામ પંચાયતની ગ્રામસભા મળી હતી.જેમાં દમણ જિલ્લા પંચાયતના પ્રમુખ શ્રી નવિનભાઈ પટેલ, જિલ્લા પંચાયતના ઉપ પ્રમુખ અને કડૈયા વિભાગના જિલ્લા પંચાયત સભ્ય શ્રીમતી મૈત્રીબેન પટેલ, દમણ જિલ્લાના વિકાસ ઘટક અધિકારી (બીડીઓ) શ્રી પ્રેમજીભાઈ મકવાણા, દમણ જિલ્લા પંચાયતના જાહેર બાંધકામ વિભાગના સહાયક ઈજનેર શ્રી સંદિપભાઈ તંબોલી અને અન્ય વિભાગથી આવેલા અધિકારીઓ તથા કર્મચારીઓ ઉપસ્થિત રહ્યા હતા.
આ પ્રસંગે કડૈયા ગ્રામ પંચાયતના સરપંચ શ્રી શંકરભાઈ પટેલે ગ્રામ પંચાયતની સિમિત સત્તા અને ધારાધોરણ હેઠળ કરેલા વિકાસકામોની પણ જાણકારી આપી હતી અને 2023-’24 માટેના પ્રસ્તાવો પણ રજૂ કર્યા હતા.
આ ગ્રામસભામાં વિવિધ વિભાગોથી આવેલા અધિકારીઓ તથા કર્મચારીઓએ પોતાના વિભાગમાં કાર્યરત ભારત સરકાર તથા સંઘપ્રદેશ પ્રશાસનની વિવિધ યોજનાઓ અંગે ગ્રામજનોને વિસ્તૃત માહિતી આપી હતી.
કડૈયા ગ્રામ પંચાયતના સેક્રેટરી શ્રી પ્રિયાંક પટેલે ગ્રામસભાની કાર્યસૂચિ મુજબ ગત વર્ષની ફિઝિકલ પ્રોગ્રેસ, ફંડ યુટિલાઈઝેશન, ચાલુ વર્ષની યોજનાઓનું અમલીકરણ તથા અગામી વર્ષના એક્શન પ્લાન અંગે ચર્ચા કરવામાં આવી હતી. ભારત સરકારના પંચાયતી રાજ મંત્રાલયના આદેશ મુજબ આવનારા વર્ષ 2023-’24 માટે ગ્રામ પંચાયત ડેવલપમેન્ટ પ્લાન(જીપીડીપી) ગ્રામજનોની સમક્ષ રજૂ કરી તેનેસર્વાનુમતે મંજૂર કરવામાં આવ્યો હતો.
