ચૂંટણી બાદ પોલીસે ચેકપોસ્ટ દુર કરતા બુટલેગરોએ દારૂની હેરાફેરી વધારી
(વર્તમાન પ્રવાહ વાપી બ્યુરો)
વાપી, તા.14: વલસાડજિલ્લામાં ચૂંટણી આચાર સંહિતા દરમિયાન પોલીસે અનેક સ્થળોએ કામ ચલાઉ ચેકપોસ્ટ દારૂની હેરાફેરી રોકવા કાર્યરત કરી હતી. પરંતુ ચૂંટણી બાદ ચેકપોસ્ટ પોલીસે હટાવી દીધી, બાદમાં બુટલેગરો ફરી દારૂની ગતિવિધિઓ વધારી દીધી છે. આજે બુધવારે વલસાડ હાઈવે ઉપર બાતમી વાળી કારનો એલ.સી.બી.એ ફિલ્મી ઢબે પીછો કરતા કાર ચાલક કારને ખનકીમાં ઉતારી ફરાર થઈ ગયો હતો.
વલસાડ એલ.સી.બી.ને મળેલી બાતમી આધારે આજે બુધવારે પારનેરા સુગર ફેક્ટરી પાસે વોચ ગોઠવી હતી તે દરમિયાન બાતમી વાળી એસ.યુ.વી. કાર નં.જીજે 01 આર.પી. 0092 આવતા જ પોલીસે અટકાવા કોશિષ કરી હતી. પણ ચાલક ભાગી જતા ફિલ્મી ઢબે પોલીસે પીછો કરેલો ત્યારે કાર ચાલકે ચન્દ્રમૌલી મંદિર પાસે કારને ખનકીમાં ઉતારી ચાલક ભાગી ગયો હતો. પોલીસે ક્રેઈનની મદદથી કાર બહાર કાઢી કારમાં ભરેલ દારૂનો જથ્થો અને કારનો મુદ્દામાલ કબજે લઈ કાયદેસરની કાર્યવાહી હાથ ધરી હતી.
