હોલીકા દહન 6 માર્ચ સોમવાર કે 7 માર્ચ મંગળવારે તેની પ્રવર્તી રહેલ અવઢવઃ જ્યોતિષીઓના મતે 6 માર્ચ સોમવારે હોળી
(વર્તમાન પ્રવાહ વાપી બ્યુરો)
વાપી, તા.03: વાપી સહિત વલસાડ જિલ્લામાં હોળી-ધુળેટી તહેવારોની ઉજવણીની તૈયારીઓ શરૂ કરવામાં આવી રહી છે. પરંતુ હોળીકા દહન અંગે અવઢવ પણ ઉભી થયેલી જોવા મળી છે. 6 માર્ચ સોમવારે હોલીકા દહન કે 7 માર્ચ મંગળવારે ની ઉભી થયેલી અવઢવ અંગે જ્યોતિષીઓ દ્વારા ખુલાસા જાહેર કરવામાં આવ્યા છે.
પારડી સંસ્કૃત મહાવિદ્યાલયના નિયામક અને જ્યોતિષી ભાવેશભાઈ જોષીએ જણાવ્યું છે કે, 6 માર્ચ સોમવારે સાંજે 06:43 મિનિટે સુર્યાસ્ત પછીનું મુહૂર્ત છે. ઘણા 7 માર્ચની પૂનમ ગણાવી રહ્યા છે. પૂનમ સોમવારે સાંજે 04:18 મિનિટથી શરૂ થાય છે. આખી રાત પૂનમ રહે છે તેમજમંગળવારે સાંજે 06:09 મિનિટે એકમ થઈ જાય છે તેથી મંગળવારે સુર્યાસ્ત પહેલાં પૂનમ પુરી થઈ જાય છે તેથી વલસાડ જિલ્લામાં 6 માર્ચ સોમવારે હોળી પ્રગટાવાશે.
