(વર્તમાન પ્રવાહ ન્યુઝ નેટવર્ક)
પારડી, તા.13: પારડી તાલુકાના તિઘરા સીમાર ફળિયા ખાતે રહેતા મનોજભાઈ સતિષભાઈ નાયકાના ઘરે ઘણા સમય બાદ લગ્ન પ્રસંગ હોય સમગ્ર પરિવારમાં ખુશીનો માહોલ હતો. આનંદથી લોકો લગ્ન ગીત ગાઈ ખુશી મનાવી રહ્યા હતા. એક દિવસ પછી ચાંલ્લાવિધિ અને આગામી પાંચ દિવસ બાદ જ 18મી તારીખે લગ્ન પ્રસંગ હોય વરયાત્રા લઈ ટુકવાડા ખાતે પરણવા જનાર વરરાજા મનોજના મનમાં લગ્નના લડડુ ફૂટી રહ્યા હતા. લગ્ન પ્રસંગને લઈ આજરોજ ઘરે લગ્નમંડપ બંધાઈ રહ્યો હતો અને લગ્ન મંડપ બાંધવાની દોરીની જરૂર પડતા વરરાજા મનોજ પોતે જ હોશે હોશે ઉદવાડા ખાતેથી દોરી લઈ પરત પોતાના ઘર તિઘરા આવી રહ્યા હતા. આ દરમિયાન ઓરવાડ રામદેવ હોટલની સામે, નેશનલ હાઈવે નંબર 48 પર વલસાડથી વાપી જવાના રોડ પર અચાનક પાછળથી એક અજાણ્યા વાહન ચાલકે ટક્કર મારતા મનોજના પ્રાણ સ્થળ પર જ છૂટી ગયા હતા અને જ્યાં લોકો આનંદથી ઝૂમી લગ્નના ગીતો ગાતા હતા ત્યાં મરશિયા ગાવાનો સમય આવ્યો હતો.અકસ્માત સ્થળે ભેગા થયેલા લોકોએ મનોજના મોબાઈલથી જ એમના કાકાના છોકરા રાહુલને આ અકસ્માત અંગે જાણ કરતા રાહુલ તથા સગા સંબંધીઓ સ્થળ પર આવી પહોંચ્યા હતા અને પારડી પોલીસમાં આ અકસ્માત અંગેની ફરિયાદ કરતા પારડી પોલીસે સ્થળ પર પહોંચી લાશને પીએમ માટે મોકલી વધુ તપાસ હાથ ધરી છે.
