સરકારે યોજનાની મુદત વધુ એકવાર લંબાવી 16 જૂન સુધીની કરી છે : પાલિકાને 105 અરજી મળી
(વર્તમાન પ્રવાહ વાપી બ્યુરો)
વાપી, તા.20: ગુજરાત સરકાર દ્વારા અનઅધિકૃત બાંધકામને નિયમિત કરવા ઈમ્પેક્ટ ફી યોજનાનો અમલ કરવામાં આવ્યો છે. ગેરકાયદે બાંધકામને રેગ્યુલાઈઝ કરવાની આ યોજનાનો લાભ લેવા કે અમલવારી કરવામાં વાપીમાં ઉદાસિનતા જોવા મળી રહી છે. અત્યાર સુધીમાં પાલિકામાં એકમાત્ર અરજી મંજૂર કરાઈ છે તેથી લાગી રહ્યું છે કે પાલિકા મહેસુલી આવક મેળવવામાં પણ રસહિન દેખાઈ રહી છે. જો કે પાલિકાને બાંધખામ રેગ્યુલાઈઝ કરવાની 105 અરજી મળી છે.
વાપી શહેરી વિસ્તારમાં ગેરકાયદે બાંધકામનો ઠેર ઠેર રાફડો ફાટેલો જ છે. પ્લાન નકશાથી વિરૂધ્ધ બાંધકામ 20 થી 30 ટકા માર્જીનનું ઉલ્લંઘન કરાયું છે. તેવા ડેવલપર અનઅધિકૃત બાંધકામને ઈમ્પેક્ટ ફી યોજના હેઠળ લાભ લઈ અધિકૃત કરી શકે છે. એ માટે સરકારે યોજના પણ બનાવી છે. તેમજપાલિકાઓને વધુ મહેસુલી આવક મળે તે હેતુસર યોજનાને સરકારે 16 જૂન સુધી લંબાવી છે. તેમ છતાં વાપીમાં આ યોજનાની અમલવારીની કોઈ ઝાઝી અસર જોવા મળી નથી. પાલિકાને 105 જેટલી અરજી મળી છે તે પૈકી એકમાત્ર અરજી બીના અભય દોશીની મંજૂર કરી છે તે પેટે ઈમ્પેક્ટ ફી રૂા.3,31,500 વસુલવામાં આવ્યા છે. તો અન્ય અરજીઓ રેગ્યુલાઈઝ કરવામાં પાલિકાની પણ નિરસતા દેખાઈ રહી છે. આ યોજનામાં 20 થી 30 ટકા પાર્કિંગ માર્જીન ઉલ્લંઘન કરનારા રૂા.150 પ્રતિ ચો.મીટર ઈમ્પેક્ટ ફી ભરી બાંધકામ નિયમિત કરાવી શકે છે.
