(વર્તમાન પ્રવાહ ન્યુઝ નેટવર્ક)
ચીખલી(વંકાલ), તા.04: નવસારી ખાણ ખનીજ વિભાગ દ્વારા 100-કરોડ રૂપિયાથી વધુની આવક પાર કરી સમગ્ર રાજ્યમાં છઠ્ઠો ક્રમ પ્રાપ્ત કર્યો છે.
ચીખલી વિસ્તારમાં બ્લેટ ટ્રેપ પથ્થરની અનેક ખાણો અને ક્વોરી પ્લાન્ટો આવેલા છે. આ વિસ્તારમાં સંઘ પ્રદેશ, દાદરા નગર હવેલી, દમણ ઉપરાંત સમગ્ર દક્ષિણ ગુજરાતમાં ખનીજ પૂરું પાડવામાં આવે છે. ત્યારે 31-માર્ચ 2023 ના રોજ પૂર્ણ થયેલા નાણાંકીય વર્ષના અંતે નવસારી ખાણ ખનીજ વિભાગ દ્વારા કુલ 10019.75 લાખ રૂપિયાની આવકને પાર કરી સરકારની તિજોરી છલકાવી દેવામાં નવસારી મદદનીશ ભૂસ્તર શાષાીની કચેરીનો સિંહફાળો રહેવા પામ્યો છે. આ ઉપરાંત આ કચેરી દ્વારા સમગ્ર વર્ષમાં 206 જેટલા કેસો કરી 1.96 કરોડ રૂપિયાનો દંડ વસુલવામાં આવ્યો હતો.
નવસારી ખાણ ખનીજ વિભાગ દ્વારા 100-કરોડ રૂપિયાની આવકને પાર પાડવામાં આવતા કચેરીમાં પણ આનંદની લાગણી છવાઈ જવા પામી હતી.
