સિટી પોલીસે 4 કાર, ત્રણ મોપેડ, 20 નંગ મોબાઈલ, દારૂનો જથ્થો મળી કુલ રૂા.28.60 લાખનો મુદ્દામાલ ઝડપ્યો : ભાજપ-કોંગ્રેસએ પ્રતિક્રિયા આપી
(વર્તમાન પ્રવાહ વાપી બ્યુરો)
વાપી, તા.14: વલસાડ તિથલ રોડ સ્થિત આદર્શ સોસાયટીના બંગલા નં.8ની છત ઉપર ગત રાત્રે બર્થ ડે પાર્ટીની મદમસ્ત મહેફીલ ચાલતી હતી ત્યાં પાર્ટીના રંગમાં સિટી પોલીસે ભંગ પાડી ભંગાણ સર્જ્યું હતું. પોલીસ રેડમાં હાઈપ્રોફાઈલ પાર્ટીમાં ભાજપના નેતાઓ સહિત 15 જેટલા નબીરા ઝડપાયા હતા. પોલીસે તમામની અટક કરી જેલ ભેગા કર્યા હતા. શહેરમાં સવારથી જ ચર્ચાઓ ચગડોળે ચઢી હતી. ઘટનાને લઈ ભાજપ-કોંગ્રેસના અગ્રણઈઓએ પ્રતિક્રિયા આપતા મામલો હાઈપ્રોફાઈલ બની ગયો હતો.
વલસાડ સિટી પોલીસ પી.આઈ.ચૌધરીને મળેલી બાતમી આધારે ગુરૂવારે રાત્રે વલસાડ તિથલ રોડ આદર્શ સોસાયટીના બંગલાની ટેરેસ ઉપર ચાલી રહેલી બર્થ પાર્ટીની મહેફીલમાં રેડ પાડી હતી. પોલીસ કાર્યવાહીમાં ભાજપના યુવા નેતાઓ પણ ઝડપાયા હતા. ઝડપાયેલા 15 નબીરાઓમાં પ્રજ્ઞેશ પટેલ, રાકેશ ઠાકોર, તપન પટેલ, મિહિર પંચાલ, આશિષ કેવટ, દર્શન પટેલ, દિનેશ આહિર, મેહુલ લાડ, નયન પટેલ, રાકેશ ઠાકરે, ભાર્ગવ દેસાઈ, પ્રિયાન્સુ દેસાઈ, દર્શન ઠાકોર અને આશિષ કેવટનો સમાવેશ થાય છે. પોલીસે ઘટના સ્થળેથછી 4 કાર, 3 મોપેડ, 20 મોબાઈલ, કિંમતી દારૂનો જથ્થો મળી કુલ રૂા.28.60 લાખનો મુદ્દામાલ જપ્ત કર્યો હતો અને તમામ 15 આરોપીઓને રાત્રે જેલ ભેગા કરાતા તમામનો નશો પોલીસે ઉતારી દીધો હતો. ઝડપાયેલામાં કેટલાક ભાજપના યુવા નેતા, પૂર્વ હોદ્દેદારો હોવાથી મામલો રાજકીય પટલ ઉપર પણ છવાઈ ગયો હતો. ઘટનાની પ્રતિક્રિયા આપતા જિલ્લા ભાજપના પ્રમુખ હેમંત કંસારાએ જણાવ્યું હતું કે, ભાજપ શિસ્ત બધ્ધ પાર્ટી છે. ભાજપના બંધારણ મુજબ પાર્ટીના જે કોઈ પણ કાર્યકર ઝડપાયેલા હશે તેમની સામે શિસ્ત ભંગના પગલાં લેવામાં આવશે. તો પ્રતિ પક્ષ કોંગ્રેસના જિલ્લા પ્રમુખ દિનેશ પટેલ, પૂર્વ સાંસદ કિશન પટેલએ પ્રતિક્રિયા આપતા જણાવ્યું હતું કે, ભાજપનું શાસન તાનાશાહી ભરેલું છે.દારૂની મહેફીલોની ઘટનાઓ વારંવાર બને છે અને ભાજપના હોદ્દેદારો ઝડપાતા રહ્યા છે તેથી ભાજપ શિસ્તબધ્ધ પક્ષ છે તેવું કેમ કહી શકાય. તેવુ કોંગી નેતાઓએ પણ વળતો પ્રતિપ્રહાર કરતા સમગ્ર મામલો રાજકીય બની ગયો હતો.
