વન વિભાગ અને ગ્રામજનોએ ખાટલો ઉતારી ત્રણ-ચાર કલાકની
જહેમત બાદ દિપડાને બહાર કાઢયો
(વર્તમાન પ્રવાહ વાપી બ્યુરો)
વાપી,તા.26: કપરાડા તાલુકાના વડોલી ગામે વિચિત્ર ઘટના સર્જાવા પામી હતી. શિકારની શોધમાં નિકળેલ દિપડો અચાનક કુવામાં ખાબકી ગયો હતો. ગ્રામજનોને જાણ થતા દિપડાનું રેસ્ક્યુ કરીને સલામત બહાર કાઢવામાં આવ્યો હતો.
કપરાડા-ધરમપુર જેવા અંતરિયાળ જંગલ વિસ્તારમાં દિપડા શિકાર કરવા નિકળતા હોય છે તે મુજબ કપરાડાના વડોલી ગામે તેવો એક દિપડો ગામમાં આવેલ એક કુવામાં ખાબકી ગયો હતો. ગ્રામજનોએ કુવામાં ખાબકેલ દિપડો જોતા વન વિભાગને જાણ કરી હતી. ફોરેસ્ટની ટીમે દોડી આવીને દિપડાને બહાર કાઢવાની કામગીરી હાથ ધરાઈ હતી. ભારેખમ દિપડો કેવી રીતે બહાર કાઢવો તેની પણ મુંઝવણ ઉભી થઈ હતી. અંતે ખાટલાને કુવામાં ઉતારીને દિપડાને ત્રણ-ચાર કલાકની જહેમત બાદ બહાર કઢાયો હતો. દિપડો કુવાનો પાઈપ બરાબર પકડી બેસી રહ્યો હતો.
