હિમેશ સુનિલ ટંડેલ અને હાર્દિક દોલત ટંડેલ બન્ને સગીરો
રવિવાર હોવાથી ખાડીમાં ન્હાવા ગયા હતા
(વર્તમાન પ્રવાહ વાપી બ્યુરો)
વાપી, તા.08: વલસાડનાહિંગરાજ ગામે આજે ગોઝારી કરુણાંતિકા સર્જાઈ હતી. જેમાં 16 વર્ષિય બે સગીર વિદ્યાર્થી રવિવાર હોવાથી વહેલી સવારે દરિયામાં ડૂબી જતા મરણ પામ્યા હતા. ઘટનાથી ગામમાં શોકની કાલીમાં સાથે પરિવારોએ રોકકળ કરી મુકી હતી.
વલસાડના હિંગરાજ ગામ પાસે આવેલ દરિયા કિનારે વેકરીયા હનુમાન પાસે આવેલ બામ ખાડીમાં રવિવારની રજા હોવાથી શાળાના પાંચ મિત્રોને દરિયા કિનારે ન્હાવા ગયા હતા. અચાનક ખાડીમાં ભરતીનું પાણી વધી જતા ગામના હિમેશ સુનીલ ટંડેલ અને હાર્દિક દોલત ટંડેલ બન્ને 16 વર્ષિય સગીરો ખાડીમાં બન્ને સગીરો ડૂબ્યા હતા. ગ્રામજનોને ઘટનાની જાણ થતા આખુ ગામ ખાડીએ પહોંચ્યું હતું. માછલીની જાળ અને દોરડા નાખીને કિશોરોની શોધખોળ હાથ ધરી હતી. ઘટનાની જાણ બાદ પરિવારજનો પણ ખાડીએ દોડી આવ્યા હતા. ડૂબેલા બન્ને કિશોરોને બે-ત્રણ કલાકની જહેમત બાદ બહાર કાઢવામાં આવ્યા હતા. પોલીસ અને એમ્બ્યુલન્સની મદદથી બન્નેને કસ્તુરબા હોસ્પિટલમાં સારવાર માટે ખસેડાયા હતા પરંતુ ફરજ પરના તબીબે બન્નેને મૃત જાહેર કરતા ઘટનાથી ગામ આખુ શોકમગ્ન બની ગયું હતું. દરિયામાં ડૂબી જવાથી પુત્રના મોતની જાણ થતાં હિમેશ અને હાર્દિકની માતા બેભાન થઈ ઢળી પડી હતી.
