દમણ-દીવના સાંસદ લાલુભાઈ પટેલ, જિલ્લા પંચાયતના પ્રમુખ જાગૃતિબેન પટેલ, જિલ્લા પંચાયતના ઉપ પ્રમુખ બાબુભાઈ પટેલ, સરપંચો, જિલ્લા પંચાયતના સભ્યો સહિત મોટી સંખ્યામાં રહેલી ભાવિક ભક્તજનોની ઉપસ્થિતિ
(વર્તમાન પ્રવાહ ન્યુઝ નેટવર્ક)
દમણ, તા.23 : દમણના મગરવાડા ગામ ખાતે નવનિર્મિત દેવાલયમાં ભગવાન શિવ પરિવારની નૂતન મૂર્તિઓના યોજાઈરહેલા પ્રાણ પ્રતિષ્ઠા મહોત્સવના ઉપક્રમે આજે સવારે દુધી માતાની આરતી તથા પૂજાનું આયોજન કરવામાં આવ્યું હતું અને બપોરે વિશાળ જળયાત્રા અને સાંજે લોકડાયરો અને સંતવાણીએ લોકોના મન મોહી લીધા હતા. વિશ્વ પ્રસિદ્ધ લોક ગાયિકા ગીતાબેન રબારી અને તેમના ગ્રુપે રજૂ કરેલા અનેક ભજનો અને કૃતિઓના કારણે સમગ્ર દમણ ભક્તિમય બની ગયું હતું. આજે દમણ-દીવના સાંસદ શ્રી લાલુભાઈ પટેલ, જિલ્લા પંચાયતના પ્રમુખ શ્રીમતી જાગૃતિબેન પટેલ, જિલ્લા પંચાયતના ઉપ પ્રમુખ શ્રી બાબુભાઈ પટેલ, સરપંચો, જિલ્લા પંચાયતના સભ્યો સહિત મોટી સંખ્યામાં ભાવિક ભક્તજનો ઉપસ્થિત રહ્યા હતા.
આવતી કાલે ત્રીજા દિવસે વિશ્વ પ્રસિદ્ધ ભાગવતાચાર્ય પ.પૂ. શ્રી ભરતભાઈ વ્યાસ દ્વારા તેમની અમૃત વાણીમાં શિવશક્તિ મહિમાનું રસપાન કરાવવામાં આવશે.
પ્રાણ પ્રતિષ્ઠા મહોત્સવના પ્રથમ દિવસ સોમવારે સુપ્રસિદ્ધ ભાગવતાચાર્ય શ્રી મેહુલભાઈ જાની દ્વારા નવનિર્મિત ભવ્ય શિવ મંદિરનું મહત્વ તથા શિવભક્તિ મહિમાનું રસપાન કરાવવામાં આવ્યું હતું.
