(વર્તમાન પ્રવાહ ન્યુઝ નેટવર્ક)
સેલવાસ, તા.11 : દાદરા નગર હવેલીના સામરવરણી ખાતે ગાર્ડન સીટી સોસાયટીની સામે પાર્કિંગ કરેલ બસની અંદર જ બસચાલકે પટ્ટા વડે ગળે ફાંસો લગાવી આત્મહત્યા કરી લેતા ચકચાર મચી ગઈ હતી.
પ્રાપ્ત વિગત અનુસાર દિનેશ કૈલાશ ગુપ્તા (ઉ.વ.48) રહેવાસી સામરવરણી જેઓ સવારે ખાનગી કંપનીના સ્ટાફને બસમાં લાવવા-લઈ જવા ડ્રાયવર તરીકે નોકરી કરતો હતો, જેસવારે કંપનીના સ્ટાફને ભરી ગલ્ફ કંપનીમાં મુકવા ગયા હતા. ત્યારબાદ પરત ઘરે આવ્યો હતો, બાદમાં બપોરે ગાર્ડન સીટી સામે બસ નંબર ડીડી-01-એ-9154 ઉભી રાખી બસના શીટ બેલ્ટને ગળામા ફસાવી લટકી ગયો હતો. બસની અંદર દિનેશ ગુપ્તાને લટકેલો જોતાં આજુબાજુના લોકો દોડી આવ્યા હતા અને પોલીસને તાત્કાલિક જાણ કરી હતી. પોલીસની ટીમ ઘટના સ્થળે પહોંચી મૃતકની લાશને 108 એમ્બ્યુલન્સ દ્વારા સેલવાસની શ્રી વિનોબા ભાવે સિવિલ હોસ્પિટલમાં લઈ જવામાં આવ્યો હતો સાથે એના પરિવારને પણ જાણ કરી હતી. જેઓ પણ હોસ્પિટલ પર પહોંચી ગયા હતા. દિનેશ ગુપ્તાએ કયા કારણોસર આત્મહત્યા કરી એ જાણી શકાયું નથી. ઘટના અંગેની ફરિયાદ નોંધી વધુ તપાસ સેલવાસ પોલીસ કરી રહી છે.
