હૂમલાના મુખ્ય સુત્રધાર કિસ્મત હળપતિની કચીગામ-દમણ પોલીસે કરેલી અટકાયત
(વર્તમાનપ્રવાહ ન્યુઝ નેટવર્ક)
દમણ, તા.04: ઉમરગામ તાલુકાના મોહનગામ ખાતે રહેતા જયેશ હળપતિ ઉપર દમણના કચીગામ પાસે ઈકો અને સ્વીફટ કારમાં આવેલા કેટલાક બુટલેગર અને તેના સાથીઓએ કરેલા હૂમલામાં પોલીસે મુખ્ય સુત્રધાર એવા કિસ્મત ગણેશ હળપતિ(રહે. મોહનગામ-તાલુકો ઉમરગામ)ની અટકાયત કરી હોવાના સમાચાર મળ્યા છે અને હૂમલાખોરોની શોધ પોલીસ કરી રહી છે.
પ્રાપ્ત માહિતી પ્રમાણે જયેશ હળપતિ સાથેની કોઈ જૂની અદાવતમાં હૂમલાના મુખ્ય સુત્રધાર કિસ્મત હળપતિએ પોતાના સાગરિતો સાથે ઢોર માર મારતાં જયેશને માથાના ભાગે ત્રણ જેટલા ટાંકા આવવા પામ્યા હતા અને શરીરના ભાગે પણ નાની-મોટી ઈજાઓ થઈ હતી. કચીગામ પોલીસ આ પ્રકરણમાં સત્તાવાર માહિતી આપવામાં સંકોચ કેમ રાખી રહી છે તે બાબતે અનેક પ્રશ્નો ઉભા થઈ રહ્યા છે.
