શનિવારે લેસ્ટરના સનાતન મંદિર ખાતે દમણ જિલ્લાના કોળી પટેલ સમાજની બેઠકનું કરેલું આયોજન
દમણ જિલ્લાના હજારો કોળી પટેલ સમાજના લોકો લેસ્ટર-લંડનમાં સ્થાયી થયા છે
(વર્તમાન પ્રવાહ ન્યુઝ નેટવર્ક)
દમણ, તા.11 : દમણ અને દીવના સાંસદ શ્રી ઉમેશભાઈ પટેલે લંડનના લેસ્ટરમાં શ્રી દમણ જિલ્લા કોળી પટેલ સમાજના સંગઠન માટે આગામી શનિવાર તા.14મી સપ્ટેમ્બરે લેસ્ટરના સનાતન મંદિર ખાતે એક બેઠકનું આયોજન કર્યું છે.
દમણ જિલ્લાના કોળી સમાજની મોટી વસતી લેસ્ટર-લંડનમાં સ્થાયી થયેલ છે. તેમની વિવિધ સમસ્યાના નિરાકરણ માટે એક પ્લેટફોર્મ ઉપર લાવવા સાંસદ શ્રી ઉમેશભાઈ પટેલે કોળી પટેલ સમાજના સંગઠનની પહેલ કરી છે. જે અંતર્ગત આગામી શનિવારે લંડનના સમય મુજબ સાંજે 4:30 કલાકે લેસ્ટરના સનાતન મંદિર, 84 વેમાઉથ સ્ટ્રીટ-લંડન ખાતે શ્રી દમણ જિલ્લા કોળી પટેલના લોકોની બેઠકનું આયોજન કર્યું છે.
અત્રે યાદ રહે કે, દમણ અને દીવ લોકસભાની ચૂંટણીમાં પણ શ્રી દમણ જિલ્લા કોળી પટેલ સમાજે મહત્ત્વની નિર્ણાયક ભૂમિકા ભજવી હતી. હવે સાંસદ શ્રી ઉમેશભાઈ પટેલ લંડનના લેસ્ટરમાં પણ કોળી પટેલ સમાજને એક છત નીચે લાવી તેમને સંગઠિત કરવાનો પ્રયાસ કરી રહ્યા છે.
