(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.27: તાલુકાના સુરખાઇ ગામે શુક્રવારના રોજ જિલ્લા કક્ષાનો ગરીબ કલ્યાણ મેળો રાજ્યકક્ષાના વન અને પાણી પુરવઠા મંત્રી મુકેશભાઈપટેલની ઉપસ્થિતિમાં યોજાયો હતો. જેમાં જિલ્લા ઉદ્યોગ કેન્દ્રના લાભાર્થીઓની સિલાઈ મશીન, અલુક મશીન, ટેબલ, વજન કાંટા સહિતની સાતેક જેટલી કિટો એજન્સી દ્વારા સોલધરા ગામની સહકારી મંડળીના ગોડાઉન ભાડે રાખી આપવામાં આવી હતી. અને સ્થાનિક વહીવટી તંત્ર દ્વારા લાભાર્થીઓને સુરખાઇ થી સોલધરા બોલાવાયા હતા.
ઉપરોક્ત સ્થિતિમાં નવસારી, ચીખલી, વાંસદા, ખેરગામ, જલાલપોર સહિતના જિલ્લાભરમાં 370 ની આસપાસ લાભાર્થીઓ બપોરે એકાદ વાગ્યાના અરસામા સોલધરા આવી ગયા હતા. જેના બે કલાક બાદ કીટનું વિતરણ શરૂ કરાતા અને પૂરતી વ્યવસ્થાના અભાવે મંથર ગતિએ વિતરણ ચાલતા મોડી સાંજે પણ કામગીરી પુરી ન થતા કલાકો થી રાહ જોતા લાભાર્થીઓની ધીરજ ખૂટતા અકળાઈને તંત્ર સામે રોષ ઠાલવતા ભારે હોબાળો થવા પામ્યો હતો. અને અવ્યવસ્થા સર્જાતા એક સમયે કાઉન્ટર બંધ કરી દેવાની નોબત આવી હતી. જેને પગલે તંત્રએ પોલીસ બોલાવવાની ફરજ પડી હતી.
સોલધરા ગામે મોડી સાંજ પડતા અંધારું પણ થઈ જતા સ્થાનિક આગેવાનો દ્વારા લાઈટની વ્યવસ્થા કરવામાં આવી હતી. અને મોડી સાંજે અધિકારીઓને અક્કલ આવતા ત્રણ કાઉન્ટર કરાયા હતા. તંત્રને લાભાર્થીઓની સંખ્યા ખબર જ હોય તેવામાં પહેલેથી જ વધારે કાઉન્ટર કરવા જોઈતાહતા.
તાલુકામાં પ્રાંત સહિતના ઉચ્ચ અધિકારીઓ હોવા છતાં આ પ્રકારની અવ્યવસ્થા સર્જાતી હોય અને લોકોએ હેરાન પરેશાન થવાની નોબત આવતી હોય તેવામાં ઉચ્ચ અધિકારીઓની વહીવટી કુશળતા સામે અનેક સવાલો ઉભા થવા પામ્યા છે.
