વલસાડ તા.૩૦: ગુજરાતના યુવાધનને યોગ તથા શારીરિક સશક્ત બનાવવાના હેતુથી વર્તમાન મોબાઈલ ટેકનોલોજીના વપરાશ સાથેના અભિગમથી મોબાઇલ ટુ સ્પોર્ટસના અભિયાનના ભાગરૂપે રમતગમત, યુવા અને સાંસ્કૃતિક પ્રવૃત્તિઓ વિભાગ હસ્તકની ગુજરાત રાજ્ય લલિતકલા અકાદમીની કચેરી તથા જિલ્લા રમત ગમત અધિકારીની કચેરીઓ દ્વારા સંયુક્ત રીતે મકરસંક્રાતિ કાર્યક્રમ અંતર્ગત એક ચિત્ર સ્પર્ધાનું આયોજન કરાયું છે. જેમાં તા.૩૧ / ૧૨ / ૨૦૨૧ ના રોજ ૮ થી ૧૩ વર્ષની વય ધરાવતા બાળકો ભાગ લઈ શકશે. સ્પર્ધકે એ-૪ સાઈઝના ડ્રોઇંગ પેપર ઉપર મકરસંક્રાતિ વિષય ઉપર પોતાની કૃતિ તૈયાર કરી તા.૨૪/૧૨/૨૦૨૧ બપોરે ૧૨:૦૦ કલાક સુધી જિલ્લા યુવા વિકાસ અધિકારી, જિલ્લા રમત ગમતની કચેરી, ૧૦૬, જૂની બી.એસ.એન.એલ કચેરી, પહેલા માળે, પોસ્ટ ઓફિસની પાછળ, હાલર રોડ, વલસાડ ખાતે પહોંચાડવાનું રહેશે.
રાજ્યકક્ષાની ચિત્રસ્પર્ધામાંથી ૧૦ વિજેતા કલાકારોની પસંદગી થશે. તેઓ પૈકી પ્રથમ વિજેતાને રૂ.૨૫૦૦૦/-, દ્વિતીય વિજેતાને ૧૫૦૦૦/, તૃતીય વિજેતાને રૂ.૧૦૦૦૦/- એમ ત્રણ ઇનામો અને બાકીના અન્ય સાત વિજેતાઓ પ્રત્યેકને રૂ.૫૦૦૦/- મુજબ આશ્વાસન ઇનામો આપવામાં આવશે. તમામ વિજેતાઓને ચિત્રકામ ડ્રોઇંગ કીટ આપવામાં આવશે. આ અંગેની વધુ માહિતી મોબાઈલ ટૂ સ્પોર્ટ્સ યોજના અંતર્ગત ફેસબુક પેજ https://www.facebook.com/mobile2sports તેમજ યુટયુબ ચેનલની લીંક http://www.youtube.com/channel/UCzsjROvtHpN4rk_ensUaz-g ઉપરથી મળી રહેશે, એમ જિલ્લા યુવા વિકાસ અધિકારી, વલસાડ દ્વારા જણાવાયું છે.
