દીવ જિલ્લામાં કાર્યરત વિવિધ સમાજ કલ્યાણ તથા મહિલા અને બાળ વિકાસ સંબંધિત ગતિવિધિનું નિરીક્ષણ કરી આપેલું જરૂરી માર્ગદર્શન
(વર્તમાન પ્રવાહ ન્યુઝ નેટવર્ક) દીવ, તા.14
સંઘપ્રદેશના પ્રશાસક શ્રી પ્રફુલભાઈ પટેલના દિશા-નિર્દેશ હેઠળ વિવિધ સચિવ સ્તરના અધિકારીઓ દીવની મુલાકાતે છે. જેમાં નવનિયુક્ત સમાજ કલ્યાણ તથા મહિલા અને બાળ વિકાસ સચિવ શ્રીમતી ભાનુપ્રભાએ આજે પોતાની દીવ મુલાકાતના બીજા દિવસે બાળ કલ્યાણ સમિતિ, જિલ્લા બાળ સુરક્ષા એકમ, વાત્સલ્ય વિશિષ્ટ શાળા, ચાઈલ્ડ લાઈનસર્વિસ ‘1098′ તથા વ્યસનીઓ માટે ચલાવવામાં આવી રહેલ સંકલિત પુર્નવસન કેન્દ્ર વગેરેની મુલાકાત લઈ ગતિવિધિની જાણકારી મેળવી હતી અને જરૂરી દિશા-નિર્દેશો પણ આપ્યા હતા.
સમાજ કલ્યાણ અને મહિલા તથા બાળ વિકાસ વિભાગના સચિવ શ્રીમતી ભાનુપ્રભાએ સૌપ્રથમ કલેક્ટર કચેરી ખાતે આવેલ જિલ્લા બાળ સુરક્ષા એકમના કાર્યાલયમાં બાળ કલ્યાણ સમિતિના અધ્યક્ષ તથા અન્ય સભ્યો અને જિલ્લા બાળ સુરક્ષા એકમના બાળ સુરક્ષા અધિકારી અને સ્ટાફગણ સાથે મિટીંગ કરી પ્રવૃત્તિની જાણકારી મેળવી હતી. તેમણે દીવમાં જીવનદીપ હેલ્થ એજ્યુકેશન હેલ્થ અને ચેરીટેબલ ટ્રસ્ટ દ્વારા ચલાવવામાં આવતી બાળકોની હેલ્પ લાઈન 1098 અને સરગમ યુવા મંડળ દ્વારા કાર્યરત વ્યસનીઓ માટે સંકલિત પુર્નવસન કેન્દ્રના કાર્યાલયની પણ મુલાકાત લીધી હતી. જ્યાં આ કેન્દ્રો દ્વારા કરવામાં આવી રહેલી વિવિધ કામગીરીઓનું નિરીક્ષણ કર્યુ હતું. તેઓને વધુમાં વધુ સરકાર દ્વારા અમલીકરણ કરાયેલ સુવિધાનો લાભ આપવા તથા લોકોને આ કેન્દ્રની કામગીરીથી પરચિત થાય તે માટે જાગૃતિ કાર્યક્રમનું આયોજન કરવા પણ સૂચના આપી હતી.
દીવની મુલાકાત દરમિયાન સચિવ શ્રીમતી ભાનુપ્રભાએ બાળ કલ્યાણ સમિતિના અધ્યક્ષ શ્રીમતી નિલમ ફુગ્રો, જિલ્લા બાળ સુરક્ષા અધિકારી શ્રીમતી મૈત્રી ભટ્ટ, વાત્સલ્ય વિશિષ્ટ શાળાનાસેક્રેટરી શ્રી ઉષ્માન વોરા, સરગમ યુવા મંડળના પ્રમુખ શ્રી વિનોદભાઈ જેઠવા, ચાઈલ્ડ લાઈનના કો-ઓર્ડિનેટર શ્રી તન્વીર ચાવડા વગેરે સાથે મુલાકાત કરી બાળકો માટે તેમના દ્વારા કરવામાં આવી રહેલી કામગીરી બદલ સંતોષ વ્યક્ત કરી વધુ સારી કામગીરી માટે જરૂરી માર્ગદર્શન આપ્યું હતું.
