ગ્રામ પંચાયતના વહીવટનું કરેલું પ્રત્યક્ષ નિરીક્ષણ અને લાયબ્રેરી નિહાળી ખુશ થયેલા વિદ્યાર્થીઓ
(વર્તમાન પ્રવાહ ન્યુઝ નેટવર્ક)
દમણ, તા.19: દમણ જિલ્લા પંચાયત સંચાલિત સરકારી પ્રાથમિક અને ઉચ્ચ પ્રાથમિક શાળા ભામટીના વિદ્યાર્થીઓએ આજે દમણવાડા ગ્રામ પંચાયત અને લાયબ્રેરીની મુલાકાત લીધી હતી.
ભામટીની પ્રાથમિક અને ઉચ્ચ પ્રાથમિક શાળાના વિદ્યાર્થીઓએ ગ્રામ પંચાયત દ્વારા થતા વહીવટની પ્રત્યક્ષ જાણકારી મેળવી હતી. આ પ્રસંગે સરપંચ શ્રી મુકેશ ગોસાવીએ જણાવ્યું હતું કે, ગ્રામ પંચાયત એટલે ગામની સરકાર અને લોકશાહીનું પ્રથમ પગથિયું છે. ગ્રામસભામાં લેવાતા નિર્ણયો મુજબ ગ્રામ પંચાયત દ્વારા વાર્ષિક આયોજન કરવામાં આવે છે.
વિદ્યાર્થીઓએ દમણવાડા ગ્રામ પંચાયતની લાયબ્રેરીની પણ મુલાકાત લીધી હતી અને વિવિધ પ્રકારના પુસ્તકો નિહાળી ખુશી પણ વ્યક્ત કરી હતી. લાયબ્રેરીની નિયમિત મુલાકાતે આવવાનો પણ વિદ્યાર્થીઓએ પોતાનો સંકલ્પ જાહેર કર્યો હતો. આ પ્રસંગે ભામટી ઉચ્ચ પ્રાથમિક શાળાના ઈન્ચાર્જ આચાર્ય શ્રીમતી પ્રેમિલાબેન બી. ટંડેલના નેતૃત્વમાં શ્રીમતી મનિષાબેન આર.ટંડેલ, શ્રીમતી આરતીબેન સોલંકી, શ્રી ચેતનભાઈ બોરસા તથા શ્રી ઉદયભાઈ પટેલ તથા વિદ્યાર્થીઓ જોડાયા હતા.
