દાનહ પોલીસે ચાલ માલિકો સાથેની બેઠકમાં આપેલા જરૂરી દિશા-નિર્દેશો
(વર્તમાન પ્રવાહ ન્યુઝ નેટવર્ક) સેલવાસ, તા.25
દાનહ પોલીસની ટીમ દ્વારા ભાડેથી આપનાર મકાન માલિકો અને ચાલીમા રહેતા ભાડુઆતોની વેરીફીકેશન કરવા માટે મકાન માલિકો સાથે બેઠકનું આયોજન કરવામા આવ્યું હતું. જેમા અત્યાર સુધી જે ઓફલાઈન નોંધણી કરાતી હતી એની જગ્યાએ હવે ઓનલાઇનનોંધણી કરાવવાની છે એના માટે પોલીસે મોબાઈલ એપ ડીડીડીપી સુરક્ષા એપ બનાવી છે.જેની સમજ માટે એક્સપર્ટ દ્વારા મકાન-માલિકોને જરૂરી દિશાનિર્દેશ આપ્યા હતા અને આ એપનો ઉપયોગ કેવી રીતે કરી શકાય અને કઈ કઈ વિગતો ભરવાની હોય તે અંગે સમજણ આપી હતી.
આ એપમા જે માહિતીઓ ભરવામા આવશે તેના આધારે નજીકના પોલીસ ચોકીનો સ્ટાફ બતાવેલ એડ્રેસ પર જઈ તપાસ કરશે કે મકાન માલિક દ્વારા આપવામા આવેલ માહિતીવાળા વ્યક્તિઓ જ જેતે એડ્રેસ પર રહે છે કે પછી બીજા કોઈ રહે છે.
રૂમ માલિકોએ એક્સપર્ટને પ્રશ્ન પૂછયો હતો કે ચાલીઓમા એક રૂમમાં ત્રણથી ચાર ભાડુઆતો રહે છે પણ આ એપમા બધા ભાડૂતોની ડીટેલ લખવાનો ઓપ્શન જ નથી તેની સામે જવાબ આપતા જણાવ્યું કે આ એપને ફરી ટેક્નીકલી મોડીફાઇ કરી વધારે વ્યક્તિની ડીટેલ ભરી શકાય એવો ઓપ્શન ઉમેરવામા આવશે.
પોલીસના આ પ્રયાસથી ચાલ માલિકો પણ ખુશ થયા હતા અને જણાવ્યું હતું કે આ એપથી અમને ઘણી સુવિધા થઇ જશે. અમારે ભાડુઆતની વિગતોના કાગળો લઇ પોલીસ સ્ટેશન સુધી જવામાંથી મુક્તિ મળશે.
